«Жуфтлик сифатида ўсишимизга ишонмадик» – Билл Гейтс хотини билан ажрашаётганини эълон қилди

pic.twitter.com/padmHSgWGc

— Bill Gates (@BillGates) May 3, 2021

«Узоқ йил биргаликдаги турмуш ва фаолиятимиздан кейин никоҳимизни тугатишга қарор қилдик. 27 йиллик турмушимиз давомида уч нафар ажойиб болаларни тарбияладик ва кўпчиликка фойда келтирган фондни яратдик. Биз биргаликда ишлашда давом этамиз, лекин жуфтлик сифатида ортиқ ўса олишимизга ишонмаяпмиз. Ҳаётимизда янги саҳифа очаётганимиз учун оиламизда тинчлик бўлишини хоҳлаймиз», деган Билл Гейтс ўқувчиларига мурожаатида.

Айни дамда бойлиги 130 миллиард долларга баҳоланаётган Билл Гейтс Microsoft компанияси асосчиси ҳисобланади ва 1996-2007, 2009-2016 йилларда дунёнинг энг бой одами бўлиб келган. У миллиардерлар орасида энг кўп хайрия ишларини олиб боргани билан ҳам машҳур. Билл ва Мелинда Гейтснинг фонди 2016 йилгача 31 миллиард доллардан ортиқ хайрия учун сарфлагани маълум. У ўз вақтида барча миллиардерларга «Сахийлик қасами» нутқи билан мурожаат қилиб, пулларининг ярмини хайрия қилишни таклиф этганди.

1955 йилда туғилган Гейтс ўтган йили Microsoft директорлар кенгашидан чиққан ва ҳозирда компаниянинг 1,37 фоиз акцияларига эгалик қилади. Бу 26 миллиард долларга тенг дегани. Охирги йилларда хотини билан биргаликда очликдан қийналаётган давлатларга хайриялар қилган миллиардер коронавирусга қарши вакцина ишлаб чиқариш учун ҳам каттагина маблағ сарфлади.

Билл Гейт 2009 йилдан буён анъанавий тарзда йил якунлари бўйича маъруза қилиб келади. У 2010 йилдаёқ вакцинациянинг муҳим эканини айтиб келади. Шунингдек, миллиардер онлайн таълим ҳали асосий таълим йўналишига айланишини ҳам 2010 йилда айтганди. Гейтс инсоният учун кейинги душман уруш кўринишида эмас, вирус кўринишида бўлишини айтгани коронавирус пайдо бўлгач кўп эсланди ва шу сабаб Гейтс вирусни яратган деган айбловлар ҳам илгари сурилди.