Билл Гейтснинг собиқ рафиқаси уни Эпштейн файллари билан боғлиқ «саволларга жавоб бериш»га чақирди

Microsoft асосчиларидан бири Билл Гейтснинг собиқ рафиқаси Мелинда Френч-Гейтс у педофиллик учун қамалган Жеффри Эпштейннинг файлларида номи тилга олингани ортидан пайдо бўлган саволларга «жавоб бериши» кераклигини айтди. Френч-Гейтснинг сўзларига кўра, ҳужжатлар эълон қилиниши уни ўзаро турмушдаги «жуда оғриқли давр»ни ёдга олишга мажбур қилган.

«Бу гап яна очилиши шахсан мен учун жуда оғир. Чунки бу мени никоҳ давридаги жуда оғриқли дамларни эслашга мажбур қилади», – деди Мелинда Френч-Гейтс NRR Wild Card подкастида. Подкаст пайшанба куни тўлиқ шаклда эълон қилиниши режалаштирилган.

«Қандай саволлар туғилган бўлмасин, мен эса бунинг барчасини тасаввур ҳам қила олмайман, бу саволлар [ҳужжатда келтирилган] одамлар учундир, шу жумладан, менинг собиқ турмуш ўртоғим учун ҳам», – дея қўшимча қилади у.

Билл Гейтснинг Жеффри Эпштейн билан алоқалари ҳақида 2019 йилдаёқ маълум эди; америкалик журналистларга кўра, ўшанда Мелинда Френч-Гейтс ажрашиш ҳақида ўйлай бошлаган. Якунда ушбу жуфтлик 2021 йилда ажрашади.

Microsoft асосчисининг номи Эпштейн иши бўйича АҚШ Адлия вазирлиги томонидан эълон қилинган ҳужжатларнинг сўнгги қисмида тилга олинган – Илон Маскдан тортиб Британия қироли Чарлз III’нинг укаси Эндрюгача бўлган бошқа кўплаб нуфузли шахсларнинг исмлари билан бирга.

Шу билан бирга, Билл Гейтсга нисбатан ҳеч қандай айблов қўйилмаган ва ҳужжатларда унинг исми тилга олинишининг ўзи у қонунга зид бирор иш қилганини англатмайди.

Ҳужжатлар орасида 2013 йил 18 июлда Билл Гейтсга ёзилган иккита хат ҳам бор, Эпштейн уларни ўзининг электрон почтасига юборган. У бу хатларни тадбиркорга жўнатганми-йўқми, буниси номаълум.

Хатлардан бири Билл ва Мелинда Гейтс жамғармасидан ишдан бўшаш тўғрисидаги ариза сифатида ёзилган. Унда Эпштейн Билл Гейтсга «рус қизлари билан жинсий алоқанинг оқибатларини бартараф этиш учун» дори-дармон топиб берганини иддао қилади.

Иккинчи хатни эса у «қадрдоним Билл» сўзлари билан бошлаган. Унда Эпштейн Билл Гейтс у билан дўстона мулоқотни тўхтатиб қўйганидан нолиб, яна бир бор Microsoft раҳбари ўзидан жинсий йўл орқали юқадиган касалликлардан тузалиш учун антибиотиклар топиб беришни ва бу дориларни иложи борича Мелиндага билдирмасдан етказишни сўрагани ҳақида ёзган.

«Бу ҳужжатлар Эпштейннинг Гейтс билан алоқаси узилганидан ҳафсаласи пир бўлганини ва туҳмат қилиш ва тузоққа тушириш учун қанчалик нималарга тайёрлигини кўрсатади», – деган NPR радиосига Гейтснинг вакиллари.

Гейтснинг ўзи уни Эпштейн билан бир неча кечки овқатдан бошқа нарса боғлаганини рад этади.

Австралиянинг 9News каналига интервюсида у Эпштейн билан учрашганидан афсусдалигини ҳамда унинг оролига ҳеч қачон бормаганини айтган. Гейтс шунингдек Эпштейн файлларида келтирилган хатлар ўзига келмаганини айтган.

«У [Эпштейн] жуда кўплаб бадавлат одамларни танирди ва уларни глобал соғлиқни сақлаш тизимига хайрия қилишга кўндира олишини айтарди. Бу боши берк кўча бўлганини энди англаб етдим», – дея изоҳлаган Гейтс ўзининг Эпштейн билан учрашувларини.

«У билан бирга вақт ўтказиш аҳмоқлик эди. Мен – у билан таниш бўлгани учун афсусланадиган кўплаб одамлардан бириман», – дея қўшимча қилган у.