Билл Гейтс: сунъий интеллект атрофида «доткомга ўхшаш пуфак» юзага келган

Microsoft ҳаммуассиси Билл Гейтс жамият ҳозир сунъий интеллект пуфаги ичида эканини, бу ҳолат доткомлар пуфагига ўхшашини таъкидлади. Бу ҳақда у CNBC телеканалининг Squawk Box шоусидаги чиқиши чоғида гапирди. Шу билан бирга, у буни «соф спекуляция» деб аташ мумкин эмаслигини қайд этди.

У 1630-йилларда Нидерландияда бўлиб ўтган «лола манияси»ни эслаб ўтди. Ўша пайтда лолалар нархи бир неча йил давомида ошиб борган, сўнг кескин тушиб кетган. Гейтснинг айтишича, сунъий интеллект билан вазият ҳозир бундай эмас.

Миллиардер фикрига кўра, ҳозирги ҳолат 1990-йиллар охири — 2000-йиллар бошидаги доткомлар пуфагига ўхшаб кетади. Ўшанда кўплаб интернет-компаниялар ҳаддан зиёд қиммат баҳоланган ва бу катта ҳажмдаги қулашларга олиб келган эди.

Гейтс таъкидлашича, натижада «жуда муҳим нарса содир бўлди. Дунё мутлақо бошқача бўлиб қолди». Бироқ ўша пайтда фақат айрим компанияларгина муваффақият қозонган, бошқалари эса орқада қолиб, «капитални йўқ қилиб юборган».

Microsoft ҳаммуассиси кўплаб инвестициялар ўзини оқламаслигини билдирди. Шу билан бирга, у сунъий интеллектни ўз ҳаёти давомидаги «энг йирик техник ютуқ» деб атади. Унинг сўзларига кўра, сунъий интеллект қадр-қиммати улкан.

Миллиардер қўшимча қилишича, ҳозир сунъий интеллект атрофида ажиотаж юзага келган. Унга кўра, айрим инвестиция қилган компаниялар фойда кўради, бошқалар эса «жуда қиммат электр энергиясига эга дата-марказларга пул тикиб қўяди».

Маълумот учун, дотком (dotcom) — аслида .com доменига эга интернет компанияларини англатадиган атама. 1990-йиллар охирида АҚШда интернет компанияларига ҳаддан ташқари қизиқиш бўлган. Уларнинг ҳаммаси шартли равишда «дотком-компаниялар» деб атай бошланган. Шу даврда бозордаги ҳаддан ташқари қимматлашиш ва кейин кескин қулаш – dotcom bubble (дотком пуфаги) деб аталади. Шунинг учун: «дотком-компаниялар» – асосий фаолияти интернетда бўлган фирмалар, «дотком пуфаги» – айнан шу компаниялар атрофидаги спекуляция ва кейинги инқирозни англатади.