Путин Россия меҳнат мигрантлари учун шароитларни яхшилашга ҳаракат қилаётганини айтди

Россия президенти Владимир Путин РФ яқин хориж мамлакатларидан келаётган меҳнат мигрантлари учун шароитларни яхшилашга уринаётганини айтди.

«Россия хориж мамлакатларидан, биринчи навбатда, ЕОИИга аъзо давлатлардан ишлаш учун келаётган фуқароларга шароитларни максимал даражада яхшилашга ҳаракат қилмоқда ва ҳаракат қилади», – деди у Евросиё олий иқтисодий кенгашининг видеоконференция шаклида ўтказилган навбатдаги йиғилишида.

Путиннинг қайд этишича, яқин вақт ичида «Чегарасиз иш» ягона интернет тизими ва иловаси ишга тушади.

Унинг маълумот беришича, бу орқали хориж фуқаролари ишга жойлашиш учун барча ҳужжатларни онлайн расмийлаштириши мумкин бўлади. 

Эслатиб ўтамиз, бугун, 21 май куни видеоконференция шаклида Евросиё олий иқтисодий кенгашининг навбатдаги йиғилиши бўлиб ўтди. Унда Арманистон бош вазири вазифасини бажарувчи Никол Пашинян, Беларусь президенти Александр Лукашенко, Россия президенти Владимир Путин, Куба президенти Мигел Диас-Канел Бермудес, Ўзбекистон президенти Шавкат Мирзиёев, Қирғизистон президенти Садир Жапаров, Қозоғистон президенти Қосим-Жўмарт Тўқаев, Қозоғистоннинг биринчи президенти Нурсултон Назарбоев ва Евросиё иқтисодий комиссияси раиси Михаил Мясникович иштирок этди.

Анжуманда сўзга чиққан Ўзбекистон президенти ЕОИИга аъзо давлатлар ўртасида мунтазам авиақатновларни тиклашни таклиф қилди.