Ўзбекистонлик таэквондочилар илк бор тўлиқ таркибда Олимпия ўйинларида қатнашади

Аёллар ўртасида Нигора Турсунқулова ва Светлана Осипова, эркаклар ўртасида Улуғбек Рашитов Токио-2020 олимпиадаси йўлланмасини қўлга киритди.

(Чапдан) Нигора Турсунқулова, Улуғбек Рашитов, Светлана Осипова ва Никита Рафалович

Иорданиянинг Аммон шаҳрида таэквондо бўйича Токио-2020 Олимпия ўйинларига йўлланма берувчи лицензион турнир якунига етиб бормоқда. 21 май кунги баҳсларда Нигора Турсунқулова ва Улуғбек Рашитов Токио-2020 лицензиясига эга чиққан бўлса, 22 май куни ўтказилган юқори вазнли таэквондочилар баҳсларида Светлана Осипова олимпиада лицензиясини қўлга киритди.

Маълумот учун, Нигора Турсунқулова фаолиятида иккинчи бор Олимпия ўйинларига йўлланмани қўлга киритмоқда. У 17 ёшида Рио-2016 олимпиадасида иштирок этган эди.

2018 йилги ўсмирлар Олимпиадаси совриндори Улуғбек Рашитов Олимпиада йўлида дастлаб Мўғулистон, сўнг Вьетнам ва Қозоғистон терма жамоаси вакилларини мағлубиятга учратишга муваффақ бўлди.

+67 кг вазн тоифасида 4 нафар спортчи рўйхатдан ўтган. Лицензиялар финалчиларга тақдим этилиши боис ярим финалдаги ғалаба аҳамиятли бўлди. Ушбу босқичда қатнашган Светлана Осипова филиппинлик Кирсти Алорага қарши баҳс олиб борди. Бутун беллашувда устунлик қилган Осипова 27:5 ҳисобида ғалаба қозонди ва Токио-2020 Олимпиадаси иштирокчисига айланди.

Яна бир иштирокчи Никита Рафалович эса Халқаро таэквондо федерацияси (WT)нинг 2020 йил 1 январда эълон қилган рейтингига кўра олимпиада лицензиясига эга бўлганди.

Шу тариқа таэквондо бўйича Ўзбекистон терма жамоаси Токио-2020 Олимпия ўйинларига 4 та йўлланмани қўлга киритди, натижада ўз тарихида илк бор тўлиқ таркиб билан Олимпиадада қатнашадиган бўлди.

Токио-2020 Олимпия ўйинларига йўл олган ўзбекистонлик таэквондочиларнинг тўлиқ таркиби:

-68 кг: Улуғбек Рашитов

-80 кг: Никита Рафалович

-67 кг: Нигора Турсунқулова

+67 кг: Светлана Осипова

#олимпиада #Таэквондо