Ўзбекистоннинг ёш таэквондочилари жаҳон чемпионатида учта олтин медални қўлга киритди

Тошкентда 12-17 апрель кунлари Таэквондо WТ бўйича ёшлар ўртасидаги XV Жаҳон чемпионати ўтказилди.

Нуфузли мусобақада Ўзбекистон ёшлар терма жамоаси 3 та олтин, 2 та кумуш ва 1 та бронза медалини қўлга киритди.

Дастлабки олтин медалга -48 кг вазн тоифасида Ёсинбек Одилов эга чиқди. У финалда ўмонлик Довуд Ал-Юсуфийни мағлуб этди.

-51 кг вазн тоифасида Асадбек Самандаров финалда тунислик Малик Мукроний устидан ғалаба қозониб, олтин медалга сазовор бўлди.

-63 кг вазн тоифасида Моҳидил Ўктамжонова финалда италиялик София Фрассикани енгиб, олтин медални қўлга киритди.

Шунингдек, -68 кг вазн тоифасида Аюбхон Набиев, +78 кг вазн тоифасида Алишер Пак кумуш медалга сазовор бўлди.

-45 кг вазн тоифасида Шоҳжаҳон Холмуродов бронза медалини қўлга киритди.