«Раҳбарлар бу ташкилот борлигини ҳис қилсин» — Президент Бурҳоновга топшириқлар берди

Президент Шавкат Мирзиёев видеоселекторда Коррупцияга қарши курашиш агентлиги раҳбари Акмал Бурҳоновга топшириқлар берди.

«[Аксилкоррупция агентлиги раҳбари Акмал] Бурҳонов, сенинг телевизорда берган маълумотларингни кўрдим. Вилоятларга кўпроқ чиқ, токи раҳбарлар бундай агентлик ишлаётганини ҳис қилсин. Ўринбосарларинг ҳудудларга борсин», деди президент аҳолининг яшаш шароитини яхшилаш, турар жойларни таъмирлаш ишлари бўйича видеоселектор чоғида.

Шунингдек, Шавкат Мирзиёев соҳадаги коррупция билан курашиш зарурлиги бўйича қўшимча фикрлар ҳам билдирди.

«Рақамлаштиришни тезроқ жорий қила олмасак, коррупцияни йўқота олмаймиз. Ҳар бир ажратилган маблағ – халқнинг пули. Талон-торож қилинса, сўров жуда қаттиқ, жазо оғир бўлади», – дея давлат раҳбарининг сўзларини келтирмоқда Kun.uz мухбири.