Rolls-Royce дунёдаги энг қимматбаҳо автомобилни тақдим қилди. Boat Tail моделининг энг қиммат версияси нархи 28,4 млн долларни ташкил этди.
Маълумотларга кўра, Boat Tail’нинг янги модели капотининг орқа қисмида коктейллар учун айланувчи столча, ичимликларни сақлаш учун махсус музлаткич, стулчалар, қимматбаҳо идишлар жойлаштирилган. Бироқ автомобилнинг энг қизиқ жиҳати автоматлаштирилган соябони ҳисобланади. Маълумотларга кўра, ноодатий комплектациядаги машинани саёҳатларни ва очиқ ҳавода тамадди қилишни ёқтирувчи бадавлат жуфтлик буюртирган.
Британ маркаси вакилларининг таъкидлашича, автомобилни лойиҳалаш ва ишлаб чиқариш 4 йил вақт ва «ҳар бир деталига синчков эътибор» талаб этган.
Эксклюзив автомобилнинг нархи 28,4 млн долларни ташкил қилади. Компанияда таъкидланишича, бу пулга Rolls-Royce’нинг 710 минг доллар турувчи флагман лимузини Rolls-Royce Phantom’дан 40тасини сотиб олиш мумкин.
Бунгача дунёда энг қиммат машина 2019 йилда тақдим этилган 16,3 млн долларлик Bugatti La Voiture Noir гиперкари бўлиб келаётганди.
Rolls-Royce вакилларининг айтишича, Boat Tail’нинг бундай қимматлиги автомобил нолдан бошлаб лойиҳаланиб, ишлаб чиқарилгани билан боғланган.
