АҚШнинг собиқ президенти Дональд Трампнинг таъкидлашича, Хитой коронавирус пандемияси авж олиши учун жавобгар ҳисобланади ва шу сабабли пандемия оқибатида АҚШга етказилган иқтисодий зарар учун камида 10 трлн доллар товон пули тўлаши керак.
“Америка ва бутун дунё Хитой коммунистик партиясидан репарация талаб қилиши вақти келди. Биз бир овоздан Хитой товон тўлаши керак, деб айтмоғимиз лозим”, деб таъкидлаган Трамп республикачиларнинг Шимолий Каролинада ўтган қурултойида.
Трампнинг айтишича, Хитойга 10 трлн долларлик ҳисоб ёзиб берилиши керак, унга пул тўлаши керак бўлган давлатлар эса қарзни тўлашдан бош тортиши лозим. У, шунингдек, коронавирус Уҳандаги лабораторияда сунъий равишда яратилганини айтганда “ҳақ” бўлганини яна бир бор таъкидлаб ўтган.
“Бизга Хитойдан бу даҳшатли нарса кирди. Бу лаборатория, бу Уҳан”, деб айтган Трамп.
Собиқ президент, шунингдек, Хитойдан импорт қилинувчи барча товарларларга 100 фоизлик бож киритишга чақирган.
Сиёсатчи амалдаги президент Жо Байден маъмуриятини Keystone XL нефт қувуридан воз кечгани учун танқид қилган. У, шунингдек, Байденни “Шимолий оқим-2” газ қувурига қарши санкциялар киритишдан воз кечгани сабабли уни қўллаб-қувватлашда айблаган. Унинг таъкидлашича, “Байден шу тариқа Американи охирги ўринга қўймоқда”.
Трамп, шунингдек, Россия президенти Владимир Путин билан муносабатлари яхши бўлганини, “бироқ у каби ҳеч ким Россияга нисбатан қаттиққўлроқ бўлмаганини” таъкидлаб ўтган.
