Байден Женевадаги музокаралар олдидан Зеленский билан телефон орқали мулоқот ўтказади — ОАВ

АҚШ президенти Жо Байден маъмурияти Оқ уй раҳбарининг Украина президенти Владимир Зеленский билан АҚШ ва Россия президентлари саммити олдидан ўтиши мумкин бўлган учрашуви имконсизлигини маълум қилди. Бу ҳақда Оқ уйдаги манбага таяниб Axios нашри хабар берди.

Маълум қилинишича, бу Зеленский Украинанинг «Нафтогаз» давлат компанияси раҳбариятини ўзгартиришга қарор қилгани билан боғланган. Вашингтоннинг таъкидлашича, Зеленский бу билан коррупцияга қарши курашишдан бош тортган.

Бу орада Украина президенти офиси вакили Михаил Подолякнинг маълум қилишича, АҚШ ва Украина раҳбарлари 7 июнда телефон орқали суҳбатлашади. Унинг айтишича, томонлар Россия ва Украина муносабатларига тааллуқли масалаларни муҳокама қилади.

Аввалроқ Украина президенти Axios журналисти билан суҳбатда Байден ва Путин музокаралари олдидан Оқ уй раҳбари билан «дунёнинг исталган нуқтасида» учрашишга тайёрлигини билдирган. Зеленский Байден Женевадаги учрашув олдидан у билан маслаҳатлашмасдан хато қилаётганини айтган. Украина етакчиси, шунингдек, АҚШ ҳукуматининг «Шимолий оқим-2» газ қувурига қарши санкцияларни киритмаслик қароридан таажжублангани, бу ҳақда Вашингтон вакилларидан эмас, балки ОАВдан хабар топганини айтган.

Россия ва АҚШ президентлари ўртасидаги учрашув 16 июнда Швейцариянинг Женева шаҳрида бўлиб ўтади.