Европадаги энг катта қочқинлар лагерига ўт қўйган 4 афғон 10 йилга озодликдан маҳрум этилди 

Ёнғинни 2020 йил сентябрда лагерда яшаган 6 нафар афғонистонлик у ердаги карантин чораларига норозилик сифатида уюштирганди. Лагер буткул йўқ бўлган ва бир кеча ичида унда яшаган 12 мингдан ортиқ қочқин бошпанасиз қолган. Ёнғин вақтида лагерда тартибсизликлар юз берган ва муҳожирлар ўт ўчирувчиларга ёнғинни бартараф этишда тўсқинлик қилишган.     

Аввалроқ, 2021 йил мартида ёнғинни уюштиришда иштирок этган 2 нафар балоғатга етмаган ўсмирга ҳукм чиқарилган ва улар 5 йиллик қамоқ жазоси олишган.  

Греция ҳукумати ўз ҳудудидаги қочқинлар лагерлари ҳаддан зиёд тўлиб-тошгани сабабли бир неча марта танқид қилинган. Жумладан, Мориа 3 минггача қочқинни қабул қилишга мўлжалланган бўлган. Ўз навбатида, Афина тобора кўпроқ келаётган қочқинларни сақлаш учун маблағларга эга эмаслигини айтган ва Европа Иттифоқи бўйича ҳамкорларидан кўмак кўрсатишни талаб қилган. Ёнғиндан кейин лагерда яшаган кўплаб қочқинлар Европа Иттифоқининг бошқа давлатларидан бошпана олган.

2021 йилда Греция оролларида сақланаётган қочқинлар билан боғлиқ вазият анча яхшиланган. У ердаги муҳожирлар сони апрелда 9600гача қисқарган, ваҳоланки бир йил аввал улар сони 40 минггача етган. Уларнинг сони сезиларли камайишига пандемия вақтида Туркия орқали амалга оширилувчи ноқонуний миграция оқими камайгани, грек чегарачиларининг муҳожирларни қўймаслик бўйича қатъий ҳаракатлари ҳамда қочқинларнинг бир қисми Грециянинг қитъадаги қисмида тақсимлангани сабаб бўлган.