Францияда комендантлик соати ва кўчада ниқоб тақиш талаби бекор қилинади

Франция ҳукумати коронавирус тарқалиши сабабли жорий этилган чекловларни юмшатишга қарор қилди. Бу ҳақда мамлакат бош вазири Жан Кастекс маълум қилди, деб хабар берди Le Parisien.

Унинг сўзларига кўра, мудофаа ва миллий хавфсизлик кенгаши кўчада ниқоб тақиш талабини бекор қилишга қарор қилган.

«Очиқ ҳавода ниқоб тақиш мажбурий бўлмайди, одам гавжум жойларда тўпланганда, навбатда турганда ёки бозорда ёхуд стадион трибуналаридаги ҳолатлар бундан мустасно», — деди бош вазир ва бу қарор 17 июндан кучга киришини айтди.

Кастекснинг маълум қилишича, 21 июндан Францияда комендантлик соати бекор қилинади.

«Мамлакатдаги санитар вазият яхшиланмоқда. Душанбадан комендантлик соати бекор қилинади», — деди у.

Жонс Ҳопкинс университети маълумотларига кўра, Францияда коронавирус юқтирганлар сони 5,8 миллиондан ортиқ, 110,6 минг бемор вафот этган. Мамлакатда 44,3 млн киши коронавирусга қарши эмланган.