Кувайтнинг коронавирусга тўлиқ эмланмаган фуқароларига мамлакатдан чиқиш тақиқлаб қўйилди

Кувайт ҳукумати коронавирус пандемиясига қарши янги чоралар киритилиши доирасида коронавирусдан тўлиқ эмланмаган фуқароларга амирликдан чиқишни тақиқлашини ва мамлакатга киришда муайян чекловлар киритишини эълон қилди.

Фото: Courtesy of Al Anba

Ҳукуматнинг расмий вакили Тарик ал-Музрамнинг маълум қилишича, кувайтликлар мамлакатда маъқулланган вакцинадан 2 дозасини қабул қилгачгина амирликдан чиқишлари мумкин бўлади. «Бироқ бу ҳомиладор ва ёши ёки саломатлиги туфайли вакцина ололмайдиганларга тааллуқли бўлмайди», деб айтган ал-Музрам.

Бундан ташқари, Кувайтга амирликда маъқулланган 3та вакцина — Pfizer, AstraZeneca, Moderna билан тўлиқ эмланган ёки Johnson & Johnson’нинг бир дозасини олган хорижликлар кира олади. Шу билан бирга, амирликка келувчилар 72 соат ичида топширилган манфий ПЦР-тестга эга бўлишлари керак. Шунингдек, улар амирликка келгандан 7 кун ўтиб яна бир тест топширишлари лозим. Бу вақт давомида улар уйда қолишлари зарур.

Кувайт ҳукумати эмланганларга ва эмлашдан озод қилинганларга 27 июндан бошлаб ресторан, кафе, гўзаллик салонлари, спортзаллар, савдо марказларига ташриф буюришга рухсат берди.

16 июнда Кувайт соғлиқни сақлаш вазирлиги мамлакатда коронавируснинг ҳиндча штамми билан касалланиш ҳолатлари аниқланганини маълум қилди. Июн бошидан бери амирликда кунлик касалланиш ҳолатлари 1,3 мингдан кўпроқни ташкил қилмоқда ва бу рақамлар тобора ўсиб бормоқда. Охирги суткада мамлакатда 1,5 мингдан кўпроқ касалланиш ҳолати аниқланган, 6 киши вирусдан вафот этган.