Байденнинг ёрдамчиси АҚШ Россияга қарши янги санкциялар киритишини эълон қилди

Вашингтон Алексей Навальний билан боғлиқ вазият муносабати билан янги санкциялар тайёрламоқда. Бу ҳақда АҚШ президентининг миллий хавфсизлик бўйича ёрдамчиси Жейк Салливан CNN телеканалига берган интервьюсида маълум қилди.

"Биринчидан, томошабинларимиз Алексей Навальнийнинг заҳарланиши сабабли Россияга қарши санкциялар киритганимизни тушунишлари муҳим ва биз бу вазият билан боғлиқ яна бир санкциялар пакетини тайёрлаяпмиз", - деди у.

Унинг сўзларига кўра, пакет тайёр бўлиши билан янги санкциялар киритилади.

Аввалроқ Россия президенти Владимир Путин ва АҚШ президенти Жо Байден ўртасида Женевада бўлиб ўтган учрашувда Алексей Навальний мавзуси ҳам кўтарилган.

«У қамоқда ўлиб қолса, оқибати Россия учун жуда ёмон бўлишини эслатдим», деган АҚШ президенти.

Алексей Навальний ўтган йил 20 август куни Томск — Москва йўналишидаги парвоз вақтида самолётда ҳушини йўқотганди. Ўшанда самолёт Омскка мажбурий қўнган ва бемор зудлик билан шифохонага ётқизилганди. 22 август куни эса уни кома ҳолатида «Шарите» клиникасига олиб боришди.

Германия ҳукумати Навальний Россияда асаб тизимини фалаж қилувчи, таркиби жиҳатдан «Новичок» моддасига ўхшаш жанговар модда билан заҳарлангани ҳақида маълум қилди. Германия қуролли кучлари лабораториясида ўтказилган тадқиқот натижалари унинг организмида заҳар изларини аниқлади, 14 сентябрь куни Швеция ва Франциядаги лабораторияларда ҳам бу маълумот тасдиқланди.