АҚШ Эрон олий раҳнамоси Али Ҳоманаийга нисбатан киритилган санкцияларни бекор қилиши мумкин

Маълумот берилишича, бу масала АҚШнинг Эрон билан ядровий келишувга қайтиши бўйича Венада ўтказилган музокараларда муҳокама қилинган.

Фото: Official Khamenei Website via Reuters

АҚШ президенти Жо Байден маъмурияти Эрон олий раҳнамоси Али Ҳоманаийга нисбатан киритилган санкцияларни олиб ташлаш имкониятини кўриб чиқмоқда. Бу ҳақда NBC телеканали ўз манбасига таяниб хабар берди.

Телеканалнинг маълумот беришича, бу масала АҚШнинг Эрон билан ядровий келишувга қайтиши бўйича Венада ўтказилган музокараларда муҳокама қилинган.

Али Ҳоманаийга қарши санкциялар 2019 йилда аввалги президент Доналд Трамп томонидан киритилганди.

Венада апрелдан бери Эрон ва халқаро "бешлик" (Россия, Буюк Британия, Германия, Хитой ва Франция) ўртасида Эрон ядровий келишувини қайта тиклаш бўйича музокаралар ўтказилмоқда.

Аввалроқ АҚШ Эронга қарши киритилган минглаб санкцияларни олиб ташлашни режалаштираётгани хабар қилинганди.

Тайёрлаган: Дилшод Аскаров

#АҚШ #Эрон #санкция