«Қоида ўрнатганларнинг ўзлари унга амал қилишлари керак ва шу боис истеъфога чиқишим шарт», деди Мэтт Ҳэнкок.
Фото: Dan Kitwood/Getty Images
Буюк Британия соғлиқни сақлаш вазири Мэтт Ҳенкок ўзи билан боғлиқ можародан сўнг истеъфога чиқишини эълон қилди.
Вазир маъшуқаси билан учрашиб ижтимоий масофа сақлаш қоидасини бузгани учун халқдан узр сўради.
«Бугун соғлиқни сақлаш ва ижтимоий ишлар вазири лавозимидан истеъфога чиқишни сўраш учун бош вазир билан учрашдим. Коронавирус пандемиясига қарши кураш ва карантин давомида мамлакатнинг барча аҳолиси қурбонлар беришига тўғри келганини тушунаман. Қоида ўрнатганларнинг ўзлари унга амал қилишлари керак ва шу боис истеъфога чиқишим шарт», деди Ҳэнкок Twitter саҳифасида жойлаштирган видеомурожаатида.
Ҳэнкок бутун пандемия давомида қироллик фуқаролари ижтимоий масофага амал қилишлари шартлигини таъкидлаб келганди.
