Ургутда ўз ерига ўзбошимчалик билан бино қурган фермерга жиноий иш қўзғатилди

Ургутда ўз ерига ўзбошимчалик билан бино қурган ва унумдор ер қатламига зарар етказган фермер хўжалиги раҳбарига нисбатан жиноят иши қўзғатилган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги департаментнинг Ургут туман бўлими томонидан ўтказилган терговга қадар текширувда, «О.» фермер хўжалигига қишлоқ хўжалиги экинларини етиштириш учун ажратилган 52,4 гектар ер майдонидан хўжалик раҳбари белгиланган йўналишларда фойдаланмасдан келгани аниқланган.

У бино-иншоот қуришга рухсат берувчи ҳужжатлари мавжуд бўлмаган ҳолда, ўзбошимчалик билан 20 сотих ерда қурилиш ишларини амалга оширган. Бундан ташқари, 18 сотих ернинг унумдор қатламидан тупроқ кавлаб олган. Оқибатда, жами 38 сотих ер майдонининг қишлоқ хўжалиги оборотидан чиқишига йўл қўйиб, давлат ва жамият манфаатларига 279,6 миллион сўм зарар етказилган.

Қайд этилишича, мазкур ҳолат юзасидан фермер хўжалиги раҳбари У.Қ. ва бошқаларга нисбатан Жиноят кодексининг 229-моддаси (ўзбошимчалик) билан жиноят иши қўзғатилиб, тергов ҳаракатлари ўтказилмоқда.