“Гул деб ўйлабман” – Ургутда томорқасида 229 туп каннабис етиштирган аёл озодликдан маҳрум қилинди

Самарқанд вилоятининг Ургут туманида 5 фарзанднинг онаси бўлган аёл томорқасида тақиқланган ўсимлик етиштиргани учун жиноий жазога тортилди. Kun.uz суд ҳукми билан танишди.

Суд ҳужжатида келтирилишича, 1982 йилда туғилган М.У. ўз яшаш ҳовлиси томорқасига 2025 йил апрел ойи ўрталарида келгусида ўтказиш мақсадини кўзлаб каннабис уруғларини эккан. Сўнгра униб чиққан 229 туп гиёҳванд ўсимликни парваришлаб келган.

2025 йил 4 августда ўтказилган тезкор профилактик тадбирда ушбу каннабислар ашёвий далил тариқасида ҳужжатлаштириб олинган. Самарқанд вилоят ИИБ Эксперт-криминалистика марказининг хулосасига кўра, М.У. етиштирган ўсимлик таркибида тетрогидроканнабинол гиёҳванд моддаси борлиги ва улар каннабис экани тасдиқланган.

Аёл судда ўз айбига иқрорлик билдирган ва каннабисни гул деб ўйлаганини айтган.

“Турмуш ўртоғим бошқа вилоятларда устачилик қилади. Уйда хўжалик ишлари билан ўзим шуғулланаман. Апрел ойида Ургут тумани Деҳқонобод маҳалласидаги деҳқон бозорда нотаниш аёлдан помидор кўчати ва гул уруғи сотиб олдим. Кўчатларни ҳовли томорқасига экдим, уруғларни маккажўхори ичига сепиб чиқдим. Гул деб эккан уруғларим униб чиққанда гулламади. Аммо катта бўлгач гуллаши мумкин, деб парваришлаб келдим. Гиёҳванд ўсимлик экканимни билмадим, билганимда парваришламаган бўлардим”, деган М.У. ўз кўрсатмасида.

Шунингдек, у каннабисни бирор кишига сотиш мақсади бўлмаганини, қилмишидан пушаймонлигини айтиб, суддан енгиллик сўраган.

ЖИБ Ургут туман судининг 2025 йил 20 октябрдаги ҳукми билан М.У. Жиноят кодексининг 270-моддаси (Тақиқланган экинларни етиштириш) 1-қисми ва 273-моддаси (Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 2-қисмида назарда тутилган жиноятларни содир этганликда айбли деб топилган. Унга 3 йил 8 ой муддатга озодликдан маҳрум қилиш жазоси тайинланган. Жазони умумий тартибли колонияда ўташ белгиланган.