ОАВ Хитой баллистик ракеталар учун 100дан кўпроқ шахта қураётганини маълум қилди

Фото: Reuters

Хитой ҳукумати қитъалараро баллистик ракеталарни учириш учун 100дан ортиқ янги шахта қурмоқда. Қурилиш ишлари Гансу провинциясидаги чўл ҳудудида олиб борилмоқда, деб хабар берди The Washington Post нашри.

Нашр маълумотларига кўра, бу ҳақда Калифорниядаги Миддлбери институти ходимлари маълум қилди. Улар сунъий йўлдошлардан олинган суратлар билан танишиб чиқиб, шундай хулосага келишган. Суратларда Хитойда ядро каллакларига эга баллистик ракеталар учун мўлжалланган объектлардаги каби 119та бир хил турдаги конструкцияни қуриш ишлари акс этган. Нашрнинг маълум қилишича, тадқиқотчилар шунингдек, суратларда қисман қурилган бошқарув пунктини ҳам аниқлашган.

«Агар 100дан кўп янги пуск шахтаси қурилиши якунланса, бу Хитой учун тарихий кўламдаги ўзгариш бўлади. Чунки бунгача мамлакат 250тадан 350тагача ядро қуролини ўз ичига олувчи ‘камтарона’ ядро қуролланишига эга деб ҳисоблаб келинган», дейилган мақолада.

Тайёрлаган: Шуҳрат Раҳимов

#баллистик ракета #Хитой