5 июлда Нукусдаги энг катта автотураргоҳ фойдаланишга топширилди. Бу ҳақда Қорақалпоғистон транспорт вазирлиги хабар берди.
Шу кундан бошлаб «базар стоянка»да «Дамас»лар ҳаракати қайта йўлга қўйилди. Олдин нукусликлар ёғин-сочинли кунларда тураргоҳда сув кечиб юрарди.
«Базар стоянка»нинг таъмирига 2,5 млрд 251 млн сўм кетган. Бозор маъмуриятининг маълум қилишича, бу маблағ ички имконият эвазига топилган.
«Стоянка» 4 май куни ёпилганди. Реконструкция ишларига 60 кун вақт кетди. Бу вақт мобайнида «Дамас»лар Нукус бўйлаб тарқатиб юборилди.
Aвтотураргоҳга ёмғир ва қор суви йиғиладиган махсус жиҳозлар ўрнатилган. Йўналишлар ўртасида ҳам сув тўпланмаслиги мумкин. Махсус ариқчалар бунга имкон бермайди.
Лекин ётқизилган асфалт сифати савол остида қолмоқда. Ҳайдовчиларнинг айтишича, «стоянка»га сифатсиз асфалт тўшалган.
Маълумот учун, «Базар стоянка»га ҳар бир «Дамас» 500 сўмдан кириб чиқади.
Эслатиб ўтамиз, бир йил олдин Нукус шаҳри ҳокими Утемурат Панаев Нукусдаги ягона туннел ва «базар стаянка»дан сув кечиб ўтилишига ўз муносабатини билдирганди.
