Қозоғистонда йўқолиб қолгани айтилган ўзбекистонлик аёл топилгани хабар қилинди

Қозоғистонда йўқолиб қолгани айтилган ўзбекистонлик 39 ёшли Меҳрибонби Йўлчиева топилди. Бу ҳақда Ўзбекистоннинг Қозоғистондаги элчихонасига таяниб Tengrinews.kz хабар берди.

Меҳрибонби Йўлчиеванинг айтишича, у февралда қаттиқ касал бўлиб қолган.

«Ҳароратим 40-41 даражага кўтарилиб кетди. Ўрнимдан туролмай қолдим. Карантинга олишларидан қўрқиб шифохонага бормадим. Беш ой ҳеч ким билан мулоқотда бўлмадим. Озиқ-овқат, дори-дармон кераклиги учун телефонимни сотиб юборгандим. Яқинда телефон сотиб олдим. Уйга қайтишни ўйладим, аммо ҳамма чегарада мени карантинга олишларини айтиб қўрқитди», — деган у.

Хабар қилинишича, аёлнинг қариндошлари у билан алоқа узилганидан сўнг ёрдам сўраб журналистларга мурожаат қилишган. Улар аёл қулликка тушиб қолган бўлиши мумкинлигини айтишган.