Испанияда Европа иттифоқидаги энг баланд турар жой биноси қурилиши якунланди

Испанияда Европа иттифоқидаги энг баланд турар жой биноси Intempo қурилиши якунланди. Бино 17 йил давомида қурилди.

Бенидорм шаҳрида қад ростлаган рекордчи бинонинг баландлиги 187 метрни ташкил қилади. Бино иккита минорадан иборат бўлиб, ромб кўринишидаги структура билан боғланган. Бино лифти Испаниядаги энг тезкор лифт бўлиб, у сониясига 4,2 метр тезликда ҳаракатланади ва бинонинг энг юқори қаватига 52 сонияда кўтарила олади.

Бинодаги пентхаус нархи 2 млн еврога яқинни ташкил қилади. Қолган 47та қаватдаги квартиралар нархи 257 минг евродан бошланади.

Uniq Residential промоутерининг таъкидлашича, бинодаги 256 квартирадан 100таси олдиндан сотиб бўлинган. Квартиралардан 60 фоизини испанлар, қолганларини эса руслар, скандинавлар, немислар ва белгияликлар харид қилган.

Intempo 17 йил давомида қурилган. Бу вақт ичида бино эгалари бир неча марта алмашган. Унинг ҳозирги эгаси SVPGlobal жамғармаси ҳисобланади.

Бино эгалари Intempo’нинг очилиши Бенидорм шаҳрини Ўрта Ер денгизининг “Майами”сига айлантиришда муҳим қадам бўлишига ишонмоқдалар.