Сурхондарё вилояти Шўрчи туманида бойсунлик ака-укалар икки нафар аёлни «самосуд» қилиб сочини кесишган. Ҳолат бўйича жиноий иш қўзғатилган. Бу ҳақда вилоят ИИБ хабар бермоқда.
Маълум қилинишича, 2021 йил 21 июль куни соат 16:00ларда, Шўрчи тумани Совжиронбобо маҳалласида, Бойсун тумани Даштиғоз маҳалласида яшовчи ака-ука, Х.Ботир ва Х.Тошмат, Денов тумани С.Оллоёр маҳалласида яшовчи, Х.Фарида ҳамда Минора маҳалласида яшовчи, Б.Муҳаббатни учратиб қолиб, уларга зўрлик ишлатган. Ака-ука аёлларга «Нега синглимнинг тинч яшашига тўсқинлик қиляпсан?» деб, қайчи билан сочларини кесиб, кийимларини йиртиб, қўллари билан уриб, Х.Фарида ва Б.Муҳаббатга «соғлиғининг бузилишига сабабчи бўлган енгил» тан жароҳати етказган.
Қайд этилишича, жорий йил 22 июль куни безорилик жиноятини қасддан содир қилган ака-ука Х.Ботир ва Х.Тошматга нисбатан Жиноят кодексининг 277-моддаси 2-қисми «б» банди билан жиноий иш қўзғатилган. Ҳозирда тергов-суриштирув олиб борилмоқда.
