Жабрланганлар «Ҳудудгаз Самарқанд» МЧЖ одамлар ҳолидан хабар олмаётгани, уйни тиклашда ёрдам бермаётганидан ёзғиришди. Лекин бу ташкилотнинг воқеага алоқаси йўқ. Чунки газ қувурини кесиб, ҳисоблагич ўрнатишни улар билан шартнома тузган хусусий фирма ходимлари амалга оширган. Хусусий фирма эса хонадонларга етказилган зарарни қоплаб бериш имкониятига эга эмас. Чунки етказилган зарар миллиард сўм атрофида.
Самарқанддаги «Кулоллар» маҳалласи, Ғайрат кўчаси 3-уйда истиқомат қилувчи 72 ёшли Саида Сатторованинг айтиб беришича, воқеа шу йил 9 июль куни юз берган.
«Мароқандгазсчётчиксервис» МЧЖ ходимлари хонадонга АСКУГ ақлли газ ҳисоблагичи ўрнатиш асносида ичида газ бўлган қувурни «болгарка» ёрдамида кесишган. Трубадан сизиб чиққан газ чақинга тўқнашиб, ўт чиққан ва олов томга ўрлаб, қисқа вақт ичида бутун уйнинг катта қисми кулга айланган.
Саида Сатторова марҳум турмуш ўртоғи билан 50 йилдан буён йиғиб териб қурган уйи вайронага айланганини айтиб ўтди.
Унинг ҳикоя қилишича, бу уйларни раҳматли эри хом ғишт қуйиб, ўзи кўтарган, кўп йиллардан бери болалари ва набиралари билан яшаб келаётган эди. Ўт ўчирувчилар сув сепишганда уйнинг деворлари ҳам ивиб, мустаҳкамлигини йўқотган.
Оила рўзғор тебратадиган чоғроқ дўкондаги 150 миллион сўмлик маҳсулотлар, музлаткич, совитгич каби турли жиҳозлар ҳам яроқсиз ҳолга келган.
Машъум воқеанинг афсусланарли жиҳати — Самарқанднинг бу эски шаҳар қисмида уйлар бир-бирига улаб қурилган. Аввал кўча томондаги дўкон ёнган. Сўнгра олов том орқали айланиб турар жойларга ўтган. Яна икки қўшнининг уйига ҳам уланган. Қўшни уйлардан бири буткул вайрон бўлган, иккинчисига ҳам анчагина зиён етган.
