Токио-2020. Хитой ҳаммани «чангида қолдирмоқда», Япония учинчи кун олтинсиз, Валихон Хитой учун бронза ютди

Японияда олимпиада ўйинлари давом эттирилмоқда. Август ойининг дастабки икки кунида 8 та олтин медал олган Хитой умумжамоа ҳисобида ҳаммани «чангида қолдириб кетяпти». 2 августнинг ўзида чинликлар оғир атлетикада иккита, гимнастика, ўқ отиш ва кўпкурашда биттадан олтин олишди. Натижада Хитойда ҳозирда 29 та олтин медал бор.

Дарвоқе, Валихон Сайлике исмли миллати қозоқ курашчи йигит Хитой жамоаси сафида бронза олди. Августда ҳозирча 5 та олтин олган Америка 22 та чемпионлик билан иккинчи ўринда бормоқда.

Учинчи ўринда ҳамон мезбон Япония. Хабарингиз бор, японлар 30 июл куни 17-олтинни қўлга киритиб, мамлакат олимпиячиларининг 2004 йил Афинада ўрнатилган миллий рекордини янгилаганди. Ҳеч қачон япон олимпиадачилари бир мусобақада бу қадар кўп олтин олмаганди. Япония шу билан тўхтаб қолди. Мана, уч кундирки улар олтин ололмаяпти.

Хитойда олтин энг кўп бўлса-да, худди ялпи ички маҳсулотда бўлгани каби чинликлар ҳеч Американи ортда қолдиролмаяпти. Штатларда 64 та, Хитойда 62 та медал бор. Бу борада байроқсиз Россия атлетлари 50 та медал билан учинчи ўринда. Умумжамоа ҳисобида Токиода фавқулодда зўр қатнашаётган Австралия тўртинчи ўринга кўтарилган. 1 августда нақ 4 та олтин олган Австралия руслар билан фарқни иккита олтингача етказишди. Доимгидек Австралия сув спортларида феноменлардан бири эканини исботламоқда.

Австралия охирги учта олимпиададаги энг яхши натижасини кўрсатмоқда. Улар Рио ва Лондонда 8 тадан олтин олишган, Пекин ва Афинада эса олтин мос равишда 14 ва 17 та бўлган. Австралиядан кейин Россия 12 та олтин билан бормоқда. Августдда русларда ҳозирча битта олтин бор, у ҳам кутилган олтин. Теннисдаги микс финалида икки рус жуфтлиги чиққанди ва битта олтин нақ эди. Финалда Настя Павлюченко ва Андрей Рублёв жуфтлиги Риодаги чемпион Елена Веснина бошчилигидаги жуфтликни мағлуб этишди. Яккалик финалида ҳам икки рус йигит – Карен Качанов ва Александр Зверев учрашди. Бироқ олтин Германия шарафини ҳимоя қилаётган Сашага насиб этди.

Дарвоқе, мусобақа бошида оқсаётган Германия анча жонланиб қолди. Августда қўлга киритилган теннис, кураш ва от спортидаги учта олтин немисларни умумжамоа ҳисобида саккизинчи ўринга олиб чиқди. Бироқ уларда медаллар сони атиги 23 та. Ҳа, Германия учун бу атиги.

«Усейн Болт дистанциясида» янги чемпион, узунликка сакрашда олтинни «иккига бўлишди»

Европа вакили бўлган Италия Токиода ҳозирча 4 та олтин медал қўлга киритди, лекин бу медаллар жуда қимматли. Айниқса, енгил атлетикада қўлга киритилган иккитаси. Улардан бири 100 метрга югуришда италиялик Марсел Якобсга насиб этди. У икки йил олдин узунликка сакраш билан шуғулланадиган атлет бўлган ва фақат 2021 йил май ойига келиб 100 метрга 10 сониядан тезроқ югурган. Мана шу атлет олимпиададаги энг зўр медални ютишини тасаввур қилгандингизми? Буни унинг ўзи ҳам кутмаган.

Қуйида 2 август куни ўйналган барча медаллар билан танишасиз:

Енгил атлетика, узунликка сакраш, эркаклар

1. Милтиадис Тентоглу (Греция);

2. Хуан Мигель Эчеваррия (Куба);

3. Майкель Массо (Куба).

100 метрга югуриш, аёллар

1. Жасмин Камачо-Куинн (Пуэрто-Рико);

2. Кендра Харрисон (АҚШ);

3. Меган Таппер (Ямайка).

3000 метрга югуриш, эркаклар

1. Софиан ал Баққоли (Марокаш);

2. Ламеха Гирма (Эфиопия);

3. Бенжамин Киген (Кения).

5000 метрга югуриш, аёллар

1. Сифан Ҳассан (Нидерландия);

2. Хеллен Онсандо Обири (Кения);

3. Гудаф Сегай (Эфиопия).

Диск улоқтириш, аёллар

1. Валери Оллман (АҚШ);

2. Кристин Пуденц (Германия);

3. Яйме Перес (Куба);

Бадминтон, жуфтлик, аёллар

1. Грейсия Полий/Априяни Рахаю (Индонезия);

2. Чэнь Цинчэнь/Цзя Ифань (Хитой);

3. Ким Со Ён/Кон Хи Ён (Жанубий Корея).

Эркаклар, яккалик

1. Виктор Аксельсен (Дания);

2. Чэнь Лун (Хитой);

3. Энтони Гинтинг (Индонезия).

Тўппончадан отиш, 25 метр, эркаклар

1. Жан Кикампуа (Франция);

2. Леурис Пупо (Куба);

3. Ли Юэхун (Хитой).

Тўппончадан отиш, 50 метр

1. Жан Чанхун (Хитой);

2. Сергей Каменский (Россия);

3. Миленко Себич (Сербия).

Велотрек, жамовий спринт, эркаклар

1. Хитой;

2. Германия;

3. Россия.

Оғир атлетика, аёллар, -87 кг

1. Ван Чжоуюй (Хитой);

2. Тамара Салазар (Эквадор);

3. Крисмери Сантана (Доминикан).

+87 кг

1. Ли Вэньвэнь (Хитой);

2. Эмили Кэмпбелл (Британия);

3. Сара Роблз (АҚШ).

Спорт гимнастикаси, ҳалқа, эркаклар

1. Лю Ян (Хитой);

2. Ю Хао (Хитой);

3. Элефтериос Петруниос (Греция).

Эркин машқ, аёллар

1. Жейд Кэри (АҚШ);

2. Ванесса Ферарри (Италия);

3. Ангелина Мельникова (Россия);

3. Маи Мураками (Япония).

Таяниб сакраш, эркаклар

1. Шин Чо Хван (Жанубий Корея);

2. Денис Аблязин (Россия);

3. Артур Давтян (Арманистон).

От спорти, жамовий учкураш

1. Буюк Британия;

2. Австралия;

3. Франция.

Яккалик

1. Юлия Краевски (Германия);

2. Том Макьюэн (Буюк Британия);

3. Эндрю Хой (Австралия).

Юнун-рим кураши, 60 кг, эркаклар

1. Луис Санчес (Куба);

2. Кэньитиро Фумита (Япония);

3. Сергей Емелин (Россия);

3. Валихан Сайлик (Хитой).

130 кг, эркаклар

1. Михаин Лопес Нуньес (Куба);

2. Якоб Каджая (Грузия);

3. Сергей Семёнов (Россия);

3. Ризо Қояалп (Туркия).

76 кг, аёллар

1. Алине Фоккен (Германия);

2. Аделайн Грей (АҚШ);

3. Ясемин Адар (Туркия);

3. Чжоу Цянь (Хитой).