Токио кундалиги. Эркин курашчилар бронза ҳам ололмади, Садуллаева финалда, Абдураҳмонов медал учун курашади

Енгил атлетика
Сафина Садуллаева саралаш босқичидан муваффақиятли ўтиб, финал дастурида иштирок этиш имконини қўлга киритди. Баландликка сакраш йўналишида Ўзбекистон шарафини ҳимоя қилган Садуллаева 1.95 метр баландликдан ўта олди ва В гуруҳида иккинчи ўринни эгаллаб, финалга чиқди. А ва В гуруҳларида иштирок этган атлетлардан жами 14 иштирокчи 1.95 метрдан ўтишга эришди.

Ушбу йўналишнинг финал баҳслари 7 август куни Тошкент вақти билан соат 15:35да бошланади.

Ушбу дастурда қатнашган бошқа бир ўзбекистонлик спортчи Светлана Радзивил эса 1.90 метр билан саралаш босқичида қолиб кетди.

Енгил атлетиканинг кўпкураш йўналишида Ўзбекистон шарафини Екатерина Воронина ҳимоя қилди.

У бугун учта дастурда иштирок этди. Дастлаб узунликка сакраш секторида 6,11 метр натижа қайд этди (883 очко), найза улоқтириш секторидаги беллашувларда эса 49.88 метр кўрсаткичга эришди (858) ва жами очколарини қўшганда 5329 очко тўплаб, 19-ўриндан 12-поғонага кўтарилди.

4 август кунги баҳсларда Воронина тўртта чиқишни амалга оширган ва дастурлар давомида 100 метрга тўсиқлар оша югуриш ва 200 метрга югуриш дастурларида ўз шахсий рекордини янгилашга муваффақ бўлганди:

100 метр, тўсиқлар оша: 14.19 сония (952 очко);
Баландликка сакраш: 1.77 метр (941 очко);
Ядро улоқтириш: 13.76 метр (778 очко):
200 метр: 24.67 сония (917 очко);).

Бугун эса сўнгги 800 метрга югуриш баҳсларида 2:09.73 дақиқа натижа қайд этди. Бу кўрсаткич унга 969 очко тақдим қилди. Воронина умумий ҳисобда 6298 очко жамғариб, мусобақани 12-поғонада якунлади.

Замонавий бешкураш
Замонавий бешкураш баҳсларида икки нафар ўзбекистонлик спортчилар Алисе Фахрутдинова ва Александр Савкин қатнашмоқда. Ҳар иккала спортчи ҳозирча қиличбозлик баҳсларида ўз кучини синаб кўрди, Фахрутдинова 16 ғалаба ва 19 мағлубият билан 196 жамғарган ҳамда турнир жадвалида 22-ўриндан жой эгаллаган. Савкин эса 7 ғалабага эришиб, 28 бор мағлуб бўлган ҳолда 142 очко жамғарган.

6 август санасида улар мусобақадаги иштирокини давом эттиради.

Эркин кураш
5 август куни уч нафар эркин курашчи гиламга чиқди. -57 кг вазн тоифасида Ғуломжон Абуллаев бронза медали учун ўтиш жангида америкалик Патрик Гилманга мағлуб бўлиб, бронза учун курашмайдиган бўлди. У 4 август кунги дастурда биринчи босқичдан осонлик билан ўтган, аммо чоракфиналда амалдаги жаҳон чемпиони Заур Угуевга ютқазган, россиялик курашчи финалга чиққани муносабати билан бронза учун курашиш имкониятини қўлга киритганди.

-86 кг вазн тоифасида Жавраил Шапиев ҳам бронза медали учун ўтиш жангида иштирок этди. У швейцариялик Стефан Рейхмуцни 5:2 ҳисобида енгди. Бронза медали учун баҳсда эса россиялик уч карра жаҳон чемпиони Артур Нифоновга ютқазди ва мусобақани бешинчи ўрин билан якунлади.

-74 кг вазн тоифаси вакили Бекзод Абдураҳмонов 1/8 финалда Пуэрто-Рико вакили Франклин Гомесни 10:0 ҳисобида енгиб, чоракфиналга чиққанди. Бироқ 1/4 финалда россиялик икки карра жаҳон чемпиони Заур Сидаковдан енгилди. Сидаков финалга чиққани эвазига Абдураҳмоновда бронза медали учун курашиш имконияти сақланиб қолди.

Бекзод Aбдураҳмонов 6 август куни бронза медал учун ўтиш баҳсларида Сидаковга илк босқичда мағлуб бўлган гвинея-бисаулик Aугусто Миданага қарши курашади. Бу баҳс ғолиби бронза учун Сидаковга яримфиналда ютқазган қозоғистонлик Данияр Қайсанов билан беллашади.

6 август куни Токио Олимпиадасининг 14-кунида Ўзбекистон делегациясининг 6 спортчиси баҳсларда иштирок этади.

5:30. Каноэда эшкак эшиш. Aёллар ўртасида 500 метр. Жуфтлик баҳслари. Дилноза Раҳматова ва Нилуфар Зокирова; 
 
6:20. Бадиий гимнастика. Екатерина Фетисова. Кўпкураш. Кун давомида тўртта дастурда чиқиш;

7:10. Эркин кураш. -74 кг. Бекзод Aбдураҳмонов бронза медал учун ўтиш баҳсларида гвинея-бисаулик Aугусто Миданага қарши;
 
8:10. Эркин кураш. -97 кг. Магомед Ибрагимов нимчорак финалда туркиялик Сулейман Караденизга қарши;

10:36. Замонавий бешкураш. 200 метрга эркин усулда сузиш. Aлисе Фахрутдинова;

11:45.Замонавий бешкураш. Қиличбозлик йўналиши бўйича қўшимча босқич. Aлисе Фахрутдинова.

Ўзбекистон делегацияси 5 август кунги баҳслардан кейин 2 олтин ва 1 бронза билан умумий рейтингда 32-ўринда жойлашган.