Қашқадарёда тест синовлари бошлангандан буён бошқаларнинг ўрнига кирган 24 нафар шахс ушланди

Қашқадарё вилоятида олий таълим муассасаларига кириш учун ўтказилаётган тест синовларида уяли телефон ишлатган ва бошқалар ўрнига кирган кўплаб шахслар аниқланган. Бу ҳақда вилоят ИИБ ахборот хизмати хабар бермоқда.

Маълум қилинишича, Қарши шаҳридаги «Насаф» ўйингоҳининг машғулотлар майдонида олий таълим муассасаларига кириш учун тест синовлари 2 босқичда ўтказилмоқда. Абитуриентлар синовлар ўтказилаётган майдонга киришидан аввал ҳар томонлама текширилмоқда.

Шундай бўлса ҳам айрим шахслар маълум манфаат эвазига бировнинг ўрнига тест синовларини топширишга уринмоқда. Шунингдек, тест синовларига уяли алоқа воситаларини олиб киришга уринишмоқда. Ички ишлар ходимларининг саъй-ҳаракати билан бундай шахслар тўхтатиб қолинмоқда.

Жумладан, тест синовлари бошланган 5 августдан бошлаб 9 август куни эрталаб ўтказилган синовларгача ўзганинг ўрнига кирган 24 нафар, уяли телефондан фойдаланган 38 нафар шахс аниқланган.

Қайд этилишича, ҳозирда ички ишлар органлари аниқланган ҳолатлар юзасидан суриштирув ишларини олиб бормоқда.