АҚШ пойтахти Вашингтонда Капитолий жойлашган ҳудуддаги бир нечта бинодан одамлар эвакуация қилинди ва ҳудуд ўраб олинди. Бундай чоралар конгресс кутубхонаси ёнида қора пикапда тўхтаган ҳайдовчи машинасида бомба борлигини ва уни портлатиши мумкинлигини айтгандан кейин кўрилди.
Полиция пикап миналаштирилган бўлиши мумкинлиги ҳақида хабарлар олгач, одамларни эвакуация қила бошлаган. Полициячилар машина ҳайдовчиси қўлида детонаторга ўхшаш буюм кўришган, бироқ кейинроқ бу ахборот тасдиқланмаган.
Капитолий полицияси бошлиғи Том Мэнгер брифингда гумонланувчи ҳақида ахборот берган. Ҳозирча ҳайдовчининг мотивлари номаълум, бироқ вазиятни тинч ҳал қилиш учун у билан музокаралар олиб борилмоқда. Воқеа жойига снайперлар юборилган.
Маълумотларга кўра, давлат рақами бўлмаган пикап машинаси кутубхона ёнида соат 9:15 да тўхтаган. Ҳайдовчи унинг ёнига келган полициячига машинасида бомба ва детонатор борлигини ҳамда ҳаммаёқни портлатишини айтган.
Бир нечта полициячи машинада портловчи қурилмага ўхшаш ҳеч нарса кўришмаганини айтишган. Уларнинг таъкидлашича, полиция ҳозирча ҳайдовчининг таҳдидидан келиб чиқиб иш кўрмоқда.
Конгрессдаги баъзи ходимларнинг таъкидлашича, дастлаб уларга кўчага чиқмаслик ва ўз хоналарида қолиш айтилган. Маълум қилинишича, жорий ҳафтада Капитолийда конгрессменлар йўқ.
