Вашингтон Куба раҳбариятига босимни кучайтирмоқда

АҚШ Молия вазирлиги Куба президенти Мигель Диас-Канель ва собиқ раҳбар Рауль Кастронинг оила аъзоларига қарши янги санкциялар жорий қилди. Вашингтоннинг таъкидлашича, мазкур чоралар Куба раҳбариятига нисбатан босимни кучайтириш сиёсати доирасида қабул қилинган.

Фото: REUTERS

Оқ уй 4 июнь куни Куба президенти Мигель Диас-Канель ҳамда мамлакатнинг собиқ раҳбари Рауль Кастро оиласининг бир қатор вакилларига нисбатан иқтисодий санкциялар жорий этилганини маълум қилди.

Маълум қилинишича, АҚШ Давлат департаменти Диас-Канелга нисбатан аввал ҳам санкциялар қўллаган бўлса, янги чекловлар президентнинг турмуш ўртоғи ва ўгай ўғлини ҳам қамраб олган. Шунингдек, Рауль Кастронинг ўғли ва набираларидан бири ҳам санкциялар рўйхатига киритилган.

Рауль Кастро Куба инқилоби етакчиси Фидель Кастронинг укаси ҳисобланади. 95 ёшли сиёсатчи расмий лавозим эгалламаса-да, мамлакатдаги муҳим қарорларга таъсир кўрсатишда давом этаётгани таъкидланмоқда. АҚШ ўтган ойда уни 1996 йилда икки фуқаролик самолётининг йўқ қилинишини ташкил этишда айблаган эди. Ўша ҳодисада тўрт киши ҳалок бўлган.

Вашингтон ва Ҳавана ўртасидаги муносабатлар сўнгги ойларда янада кескинлашди. Куба расмийлари АҚШни орол давлатига қарши ҳарбий ҳаракатлар учун баҳона излашда айблаб келмоқда. Президент Дональд Трамп эса бир неча бор Куба устидан назорат ўрнатиш ҳақида кескин баёнотлар берган.

Куба 1962 йилдан буён АҚШнинг иқтисодий эмбаргоси остида яшаб келмоқда. Мамлакат ҳозирда Совет Иттифоқи парчаланганидан кейинги энг оғир иқтисодий инқирозлардан бирини бошдан кечирмоқда. Оролда электр энергияси узилишлари ва ёқилғи танқислиги кузатилмоқда.

Нашр маълумотларига кўра, Венесуэла президенти Николас Мадуронинг ҳокимиятдан четлатилишидан кейин Кубанинг энергетика таъминоти билан боғлиқ муаммолари янада кучайган. Венесуэла аввалроқ Кубанинг асосий нефть етказиб берувчиларидан бири ҳисобланган.