АҚШ конгресси ёнида машинасини портлатиш билан таҳдид қилган эркак полицияга таслим бўлди

АҚШ пойтахти Вашингтонда конгресс кутубхонасига машинада келиб, ундаги бомбани портлатиш билан таҳдид қилган эркак бир неча соатлик музокаралардан кейин полицияга таслим бўлди.

Фото: Telegram/Baza

The New York Times нашрининг хабар беришича, эркак қўлга олиниши вақтида қаршилик кўрсатмаган.

Аввалроқ Reuters журналистлари эркак шахсини аниқлаб, унинг собиқ рафиқаси билан боғланишган. Аниқланишича, эркак шизофрениядан азият чекиб келган.

Аёлнинг таъкидлашича, собиқ турмуш ўртоғи унга ўқотар қурол билан таҳдид қилган ва улар 8 йил аввал ажрашиб кетишган.

Аввалроқ, 19 августда конгресс кутубхонаси ёнида пикап тўхтагани, унинг ҳайдовчиси ижтимоий тармоқларда жонли эфир олиб боргани ва машинасида портловчи қурилма борлигини айтгани маълум қилинган. У АҚШ президенти Жо Байден билан гаплашмоқчилигини айтган.

Эркак қўлида портловчи қурилма детонатори борлиги, у қаттиқ товушга ишлаб кетиши ва агарда полиция уни ўққа тутадиган бўлса, портловчи қурилма портлашидан огоҳлантирган.

Полиция воқеа жойини ўраб олиб, яқин орадаги бинолардан одамларни эвакуация қилган.