Қашқадарёда ИИБ ходимининг кийимини йиртиб ташлаган шахсга жиноий иш қўзғатилди

Ижтимоий тармоқларида Қашқадарё вилояти Чироқчи туманида фуқаро профилактика инспекторига фаол қаршилик кўрсатиб, қонуний талабларини бажармасдан унинг эгнидаги хизмат кийимини тортиб йиртгани тасвирланган видеолавҳа тарқалди. Вилоят ИИБ ахборот хизматининг хабар беришича, ушбу шахсга нисбатан Чироқчи туман прокуратураси томонидан жиноий иш қўзғатилган.

Маълум қилинишича, 2021 йил 28 август куни соат 11:00ларда Чироқчи тумани ИИБ 4-сон ИИБ ХПГ профилактика инспектори Б.Кўпайсиновга «Мирзатўп» МФЙда яшовчи фуқаро Х.Ж. қўнғироқ қилиб, Чироқчи тумани Мирзатуп қишлоғида жойлашган, ҳафтанинг ҳар шанба куни бўладиган Уйшун деҳқон бозорида иккита фуқаро ўзаро жанжаллашаётганини айтган.

Шундан сўнг ушбу бозорда хизмат олиб бораётган Б.Кўпайсинов воқеа жойига борганда Чироқчи тумани Уйшун қишлоғида яшовчи фуқаро Б.Д. туманнинг Араббанди қишлоғида яшовчи фуқаро О.Б. билан ўзаро оғзаки тортишиб жанжаллашаётган бўлган. Жанжал вақтида Б.Д. фуқаро О.Б.нинг юз соҳасига уриб тан жароҳати етказган.

Қайд этилишича, Б.Кўпайсинов ушбу фуқароларни тинчлантирмоқчи бўлганида фуқаро О.Б. унга фаол қаршилик кўрсатган. ИИБ ходимининг қонуний талабига бўйсунмасдан профилактика инспекторини ҳақорат қилиб, эгнидаги хизмат кийимини тортиб йиртиб, унга тан жароҳати етказган. Ҳолат бўйича фуқаро О.Б. тиббий текширувдан ўтказилганда мастлик ҳолати аниқланган.

Таъкидланишича, мазкур ҳолат юзасидан Чироқчи тумани прокуратураси томонидан О.Б.га нисбатан Жиноят кодексининг 219-моддаси 2-қисми билан жиноий иш қўзғатилган. У Жиноят процессуал кодекснинг 221-моддаси тартибида ушланган. Ҳозирда Чироқчи туман прокуратураси томонидан дастлабки тергов ҳаракатлари олиб борилмоқда.