Самарқанд шаҳрида йўл ҳаракати қоидаларини қўпол тарзда бузиб, Регистон мажмуаси олдидаги кўчада тунги вақтда фуқаролар тинчини бузиб, дрифт қилган ҳайдовчиларга чора кўрилган. Бу ҳақда вилоят ИИБ ахборот хизмати хабар бермоқда.
Ижтимоий тармоқларда Самарқанд шаҳрининг Регистон майдони олдидаги кўчада ҳайдовчилар Lacetti ва Nexia машиналарини кескин бошқариб, дрифт қилгани тасвирланган видео тарқалди. Мазкур қоидабузарлик юзасидан Самарқанд вилояти ИИБ, ЙҲХБ, Хавфсиз туризмни таъминлаш бошқармаси томонидан суриштирув ишлари олиб борилган.
Суриштирув давомида йўл ҳаракатларини қўпол тарзда бузган мазкур транспорт воситалари ҳайдовчилари топилган. Ҳайдовчиларнинг шахси аниқланиб, уларга нисбатан маъмурий баённомалар расмийлаштирилган. Lacetti ва Nexia машиналари эса вақтинчалик жарима майдончасига жойлаштирилган.
