5 фоизлик инфляция, 4 минг долларлик даромад ва 12 фоизлик ҚҚС – Шавкат Мирзиёевнинг сайловолди дастуридан ўрин олган иқтисодий тезислар

Ўзбекистон Либерал-демократик партиясининг съездида Шавкат Миромонович Мирзиёев партиядан президентликка номзод сифатида тасдиқланди ва амалдаги давлат раҳбари ўзининг келгуси 5 йилга мўлжалланган номзодлик дастури билан таништирди. Дастурдан ўрин олган ва иқтисодиёт ва солиқ  соҳасини ривожлантиришга қаратилган асосий йўналишлар:

• 2030 йилга бориб, аҳоли жон бошига тўғри келадиган даромадни 4 минг доллардан ошириб, «даромади ўртачадан юқори бўлган давлатлар» қаторига кириш кўзланмоқда. Шу мақсадда, биринчидан, келгуси беш йилда саноат маҳсулотлари ҳажми 1,4 баробар, меҳнат унумдорлиги эса камида 2 марта оширилади.
• Келгуси беш йилда рақамли иқтисодиётнинг ҳажми камида 2,5 баробарга оширилиб, 4 миллиард долларга етказилади.
• Макроиқтисодий барқарорликни таъминлаш мақсадида 2023 йил охиригача инфляция даражаси 5 фоизга туширилади. Давлат бюджети тақчиллиги ялпи ички маҳсулотга нисбатан 2,5 фоиздан ошмаслиги таъминланади.
• 2022 йилдан бошлаб ҳар бир туман бюджетининг камида 5 фоизи «Фуқаролар бюджети» дастури доирасида ҳудудлардаги долзарб муаммоларни ечишга сарфланади.
• Йиллик ташқи қарз миқдори 5 миллиард доллардан ошмаслиги таъминланади. Иқтисодиётда молиявий ресурсларни кўпайтириш мақсадида келгуси 5 йилда фонд бозори ҳажми 200 миллион доллардан 7 миллиард долларга етказилади. Бунда капитал олиб кириш бўйича мавжуд чекловлар қайта кўриб чиқилади.
• 2026 йилгача хорижий ва маҳаллий инвестицияларни жалб этиш бўйича алоҳида стратегия қабул қилинади.
• Ҳудудлардаги саноат ва инфратузилмани ривожлантириш учун Ўзбекистон тараққиёт банки ташкил этилади.
• Қўшилган қиймат солиғи (ҚҚС) ставкаси 2023 йилдан бошлаб 15 фоиздан 12 фоизга туширилади. 2022 йилдан бошлаб эса корхоналарнинг мол-мулк солиғи ставкаси 2 фоиздан 1,5 фоизга камайтирилади.
• 2023 йилдан юридик шахсларнинг мол-мулк ва ер солиқларини бирлаштириб, ягона кўчмас мулк солиғи жорий қилинади.
• Йўл қурилиши, иссиқлик таъминоти, ободонлаштириш хизматлари каби  25 та фаолият туридаги монополияга барҳам берилади.
• Банк, молия, телекоммуникация каби тадбиркорлик йўналишларида фойда солиғи ставкаси тенглаштирилиб, амалдаги 20 фоиздан 15 фоизга туширилади.
• Қишлоқ хўжалиги ерларидан унумли ва самарали фойдаланиш мақсадида, 200 минг гектар пахта ва ғалла майдонлари қисқартирилиб, аҳолига очиқ танлов асосида, 10 сотихдан 1 гектаргача узоқ муддатли ижарага берилади.
• Келгуси беш йилда интенсив боғлар 3 баробар (150 минг гектар) ва иссиқхоналар 2 баробар (11 минг гектар) кўпайтирилиши натижасида экспорт салоҳияти яна 1 миллиард долларга оширилади.
• Мамлакатнинг экспорт салоҳияти 1,7 баробар оширилиб, 2026 йилда 30 миллиард долларга етказилади. Экспорт таркибида хомашёнинг улуши ҳозирги 46 фоиздан 23 фоизга камайтирилади.