Евроиттифоқ Тожикистонда жойлаштирилган афғонистонликларга ёрдам кўрсатади

Европа Иттифоқи Тожикистон ҳудудида жойлаштирилган афғонистонлик қочқинларга 160 минг евро ажратади. “Азия-Плюс”нинг ёзишича, моддий ёрдам Хатлон вилояти ва Тоғли Бадахшон мухтор вилоятидаги 5 минг нафарга яқин қочқин учун мўлжалланган.

Ушбу маблағ Тожикистон Қизил Яримой жамиятини озиқ-овқатлар, чодирлар ва бошқа зарур эҳтиёж буюмларини қочқинларга етказиб беришда қўллаб-қувватлаш учун сарфланади. 

Маблағнинг бир қисми афғонистонлик қочқинларнинг эҳтимолий оқимига тайёргарлик кўриш учун ажратилади.

БМТнинг қочқинлар бўйича агентлиги маълумотига кўра, Тожикистонда 2021 йил охиригача 50 минг нафарга яқин афғонистонлик қочқин рўйхатга олиниши мумкин.