Хитойда йирик компаниялардан бирининг раҳбари пора олгани учун бир умрга қамалди

Бизнесмен компаниядаги фаолияти давомида 112,9 миллион юандан ортиқ пора олган.

Фото: Xinhua

Хитойдаги спиртли ичимликлар ишлаб чиқарувчи йирик Kweichow Moutai компанияси раҳбари Юан Женго пора олгани учун бир умрга қамалди, деб хабар берди Reuters.

Хабарда айтилишича, Гуйяндаги оралиқ инстанция халқ суди бизнесменни компаниядаги фаолияти давомида 112,9 миллион юандан ортиқ (17,4 млн доллар) пора олгани сабабли бир умрга озодликдан маҳрум этиш тўғрисида ҳукм чиқарди.

Қайд этилишича, Юан 1994 йилдан 2018 йилгача Kweichow Moutai компанияси бош директори ва раиси лавозимидан фойдаланиб бошқа компанияларга Moutai спиртли ичимликларини тарқатиш ҳуқуқини қўлга киритишда ёрдам берган.

Kweichow Moutai Company Limited Хитойдаги энг йирик олтмишта компания сирасига киради.

Аввалроқ Хитойда CITIC Group собиқ директори пора олгани учун 18 йилга қамалганди.