Жазоир Макроннинг сўзларидан кейин Франциядаги элчисини чақиртириб олди

“Париждан элчини чақиртириб олиш қарори Франция президентининг масъулиятсиз баёнотлари билан боғланган”, деб айтилган Жазоир президенти Абдулмажид Таббун матбуот хизматининг Twitter’даги баёнотида.

Жазоир президенти унинг давлати “мамлакатнинг ички ишларига ҳар қандай аралашувни мутлақ қабул қилмаслигини” айтган. Таббун Макроннинг айнан қайси сўзларини назарда тутганига аниқлик киритмаган. Deutsche Welle нашрининг ёзишича, Жазоирнинг Франциядаги элчисини чақиртириб олиш қарори 2 октябрда Le Monde француз нашрида чоп этилган мақола билан боғланган бўлиши мумкин. Унда айтилишича, 30 сентябрда Макрон Елисей саройидаги қароргоҳида 1954-1962 йиллар давомида Жазоир мустақиллиги учун борган урушнинг бош қаҳрамонлари авлодлари билан учрашган. Суҳбат чоғида Макрон Жазоир номига танқидий фикрлар билдириб, жумладан мамлакатни “ҳарбий-сиёсий тузум” бошқаришини, мамлакат тарихи эса “Францияга адоват билан йўғрилган ҳолда қайта ёзилгани”ни айтган.

Макроннинг бу сўзлари Жазоир оммавий ахборот воситаларида кенг тарқалган.

Аввалроқ, ўтаётган ҳафтада Франция ҳукуматининг расмий вакили Габриэль Атталь Париж Марокаш, Жазоир ва Тунис фуқароларига виза берилиши талабларини қатъийлаштиришини маълум қилган. Атталнинг таъкидлашича, бу қарор ушбу давлатлар ҳукуматлари Францияда ноқонуний тарзда қолаётган ва мамлакатни тарк этиши керак бўлган ўз фуқароларини “қайта қабул қилмаётгани” сабабли қабул қилинган. Парижнинг таъкидлашича, бу муҳожирлар орасида радикаллар учрамоқда. Шу сабабли Франция ҳукумати ушбу давлатлар фуқароларига бериладиган визаларни икки марта қисқартиришга қарор қилган.

Ушбу қарордан кейин Франция элчиси Жазоир ташқи ишлар вазирлигига тушунтириш бериш учун чақиртирилган.

Жазоир Франциянинг собиқ мустамлакаси ҳисобланади. Франция Жазоирда давом этган 8 йиллик урушдан кейин 1962 йилда Жазоирнинг мустақиллигини тан олган.