Мустақил экспертларга норматив-ҳуқуқий ҳужжатларни коррупцияга қарши экспертизадан ўтказиш ҳуқуқи берилади

2022 йил 1 январдан бошлаб илмий ташкилотлар ва олий таълим муассасалари вакиллари ҳамда жисмоний шахслар – мустақил экспертларга норматив-ҳуқуқий ҳужжатлар ва уларнинг лойиҳаларини коррупцияга қарши илмий ва мустақил экспертизадан ўтказиш ҳуқуқи берилади.

Шундай тартиб ўрнатиладики, унга мувофиқ:

• норматив-ҳуқуқий ҳужжатлар ва уларнинг лойиҳаларини коррупцияга қарши илмий ҳамда мустақил экспертизадан ўтказиш Қонунчилик ҳужжатлари ва улар лойиҳаларининг коррупцияга қарши экспертизадан ўтказиш бўйича экспертлар реестрига киритилган жисмоний шахслар томонидан, уларнинг ўз маблағлари ва (ёки) буюртмачилар ҳисобидан амалга оширилади;
• экспертлар реестри Адлия вазирлиги томонидан юритилади;
• норматив-ҳуқуқий ҳужжатлар ва уларнинг лойиҳаларини коррупцияга қарши илмий ва мустақил экспертизадан ўтказиш бўйича тузилган хулосалар тегишли давлат органлари ва ташкилотлари томонидан мажбурий кўриб чиқилади ҳамда уларни кўриб чиқиш натижалари бўйича тузилган маълумотнома экспертиза ўтказган шахслар ва Адлия вазирлигига юборилади.

Адлия вазирлиги экспертлар реестрини шакллантириш ва юритиш, коррупцияга қарши илмий ва мустақил экспертизани амалга оширадиган шахсларга қўйиладиган талабларни ишлаб чиқади ва белгиланган тартибда тасдиқлайди.