Бу ҳақда 7 октябрь куни Қишлоқ хўжалиги вазирлигининг сўнгги 5 йиллик фаолияти юзасидан ўтказилган матбуот анжуманида маълум қилинди.
«Бу йил республикада ҳар бир гектар майдондан ўртача 64 центнердан ҳосил олиниб, 6,5 млн тоннадан ортиқ ғалла хирмони кўтарилди. Ҳозир бизда ғаллани бошқа давлатларга экспорт қилиш имконияти ҳам мавжуд.
Бундан ташқари, мева ва сабзавот маҳсулотларининг экспорти ҳам йилдан йилга ошиб боряпти.
Сарҳисоб қиладиган бўлсак, шу йилнинг ўтган даврида 1 млн 100 минг тоннадан ортиқ мева сабзавотни 650 млн долларга экспорт қилишга эришдик. Бунда 84 хилдан ортиқ мева-сабзавотларимиз 70 дан ортиқ давлатга чиқариляпти. Бу албатта деҳқон ва фермерларимизнинг катта меҳнати натижаси.
Мустақилликнинг илк йилларида биз ҳар бир боғдан 50-60 центнердан ҳосил олардик, ҳозир эса 500 центнердан ҳам ҳосил оляпмиз. Бу соҳада илм-фан билан боғлиқлик натижаси», – деди вазирлик бошқарма бошлиғи Зафар Ортиқов.
Унинг қўшимча қилишича, Ўзбекистонда шу йил 90 минг гектар янги боғлар ва 80 мингдан ортиқ узумзорлар ташкил этиш режалаштирилган бўлган.
«Ҳозирга келиб биз 65 минг гектар боғ ва 34 минг гектар токзорлар барпо қилишга эришдик.
Бизда узумчилик бўйича ҳам яхши натижаларга эришиляпти. Масалан, хонадон ва фермер хўжаликларида 1 гектар ердан 100 тоннагача узум ҳосили олинди. Бу дунёда йўқ ҳосилдорлик», – Зафар Ортиқов сўзларини келтирмоқда Kun.uz мухбири.
