Россиянинг Оренбург областида 30га яқин киши қўлбола алкоголдан заҳарланиб вафот этди

Ушбу иш бўйича тўққиз киши ҳибсга олинган. Орскдаги омборда таркибида спирт бўлган суюқлик солинган 11 та 200 литрли бочка топилган.

Фото: Россия тергов қўмитаси

Оренбург области шарқида 29 киши қўлбола алкоголдан заҳарланиш оқибатида вафот этди. Бу ҳақда Россия тергов қўмитаси хабар берди.

“Айни пайтда Оренбург областининг тўртта турли ҳудудида яшаган 29 кишининг ўлими ҳолати ўрганилмоқда, қатор фуқароларга тиббий ёрдам кўрсатилди ёки кўрсатилмоқда”, – дейилади хабарда.

Қўшимча қилинишича, иш бўйича тўққиз киши ҳибсга олинган. Орскдаги омборда таркибида спирт бўлган суюқлик солинган 11та 200 литрли бочка топилган.

Оренбург области маъмурияти матбуот хизматининг хабар беришича, ичкиликдан жабрланганлар сони 31 нафарга етган. Шифохоналарга 23 киши жойлаштирилган бўлиб, улардан беш нафарининг аҳволи оғирлиги айтилмоқда.

Қўлбола алкоголдан заҳарланиш тўғрисидаги хабарлар 7 октябр куни кечқурун келиб тушган. Ушбу ҳолат бўйича олтита жиноят иши қўзғатилиб, яхлит ишга бирлаштирилган.