Алишер Қодиров ўзбек тилини кенг қўлланиладиган, замонавий тараққиётга уйғун тилга айлантиришга ваъда берди

«Ўзбек тили кенг қўлланиладиган, замонавий тараққиётга уйғун тилга айланиши учун ҳуқуқий асослар кучайтирилади.

 Бунда:

• Ўзбек тилида иш юритадиган бошқа миллатли фуқаролар маошига 25 фоизгача устама тўланади;
• Соҳага алоқадор илмий адабиётлардан бирини ўзбек тилига таржима қилиш илмий унвон олишнинг шарти сифатида киритилади;

Ўзбек тилини бепул ўргатиш курслари учун субсидиялар ажратилади», – дейилади номзод сайловолди дастуридаги «Ижтимоий адолат, қадриятларга ҳурмат ва фуқаро эркинликларини таъминлаш соҳасида» номли бандда.

Алишер Қодиров сайловолди дастуридаги ушбу бандда миллий урф-одат, анъаналар, шаклланган қадриятларга ҳурматсизлик учун жавобгарлик жорий қилишини ҳам маълум қилган.

Унга кўра, Ўзбекистон Конституцияси миллий урф-одатлар, анъана ва халқимизда шаклланган қадриятларга нисбатан ҳурматсизлик учун маъмурий жавобгарликка доир нормалар билан тўлдирилади.

Номзодга кўра, у президентликка келган тақдирда «Ислом дини — маърифат манбаи» давлат дастури қабул қилинади, шунингдек, мамлакатда сўз эркинлиги ва жамиятни демократлаштириш ҳам изчил давом эттирилади.

• «Исломий таълим муассасаларига қабул квоталари оширилади;
• Қуръон курслари оммалаштирилади;
• Диншунослик соҳасидаги илмий ишлар рағбатлантирилади;
• ОАВлар қўшимча қиймат солиғидан тўлалигича озод қилинади.

50 минг овоз жамлаган мурожаат бўйича президентнинг ОАВда шахсан муносабат билдиришига оид тизим яратилади», – дейилади жумладан Қодировнинг сайловолди дастурида.