Польша бош вазири мамлакатнинг ЕИ таркибидан чиқиши тўғрисидаги гап-сўзларни рад этди

Аввалроқ Еврокенгаш собиқ раиси, «Фуқаро платформаси» партияси етакчиси Доналд Туск Польшанинг ЕИ таркибидан чиқиши мумкинлиги тўғрисида гапирганди.

Фото: REUTERS/Bernadett Szabo

Польша бош вазири Матеуш Моравецкий Варшаванинг Евроиттифоқни тарк этиши тўғрисидаги гап-сўзларни рад этди, деб хабар берди Reuters.

Унинг сўзларига кўра, Polexit ҳақида ҳаммадан кўпроқ Польша ичидаги мухолифат гапирмоқда ва бу ёлғон.

«Мухолифат бизни ЕИдан чиқиб кетиш орқали Польша ва Евроиттифоқни заифлаштиришга олиб келишда айбламоқда. Бу нафақат ёлғон, балки ундан ҳам ёмонроқ. Бу Евроиттифоқни заифлаштириш учун айтилаётган ёлғон», — деди Моравецкий.

Аввалроқ Еврокенгаш собиқ раиси, «Фуқаро платформаси» партияси етакчиси Доналд Туск Польшанинг ЕИ таркибидан чиқиши мумкинлиги тўғрисида гапирганди. Унинг фикрича, Польша раҳбарияти мамлакатнинг Европадаги келажагини хавф остига қўймоқда.