АҚШда бир йил ичида ушланган ноқонуний муҳожирлар сони 35 йиллик рекорд кўрсаткичдан ошди

АҚШнинг чегара-божхона хизмати 2021 йилда 1,7 млн ноқонуний муҳожирни ушлади. The Washington Post нашрининг хабар беришича, бу рақамлар 1986 йилги рекорд кўрсаткичдан ошган.

Фото: Jason Garza/Reuters

Журналистларнинг таъкидлашича, ушбу муҳожирлардан 608 минги Мексикадан, 657 минги Марказий Америкадан ва 367 минги Жанубий Америкадан келган.

АҚШнинг жанубий чегарасини ноқонуний кесиб ўтишга уринишлар сонининг ўсгани 2020 йилда қайд қилинган, бироқ бу кўрсаткич Жо Байден президент лавозимини эгаллагандан кейин бир неча карра ошган.

Байден ўз сайловолди кампанияси давомида АҚШни муҳожирлар учун “меҳмондўстроқ” қилишга ваъда берган. Ушланган муҳожирларнинг аксарияти журналистлар билан суҳбатда Байденнинг бу ваъдасига ишониб ва у уларга қолишга рухсат беришига умид қилиб АҚШга келишга қарор қилишганини айтишган.