Минск АҚШ элчихонасининг жамоатчилик билан алоқалар бўлими ва USAID офисини ёпишни талаб қилди

Шунингдек, Беларусь ҳукумати элчихонадан 20 нафардан ортиқ беларуслик ходимларни ишдан бўшатишни талаб қилмоқда.

Фото: Sputnik

Беларусь АҚШ элчихонасининг жамоатчилик билан алоқалар бўлими ва АҚШ халқаро тараққиёт агентлиги (USAID), жумладан, Америка маркази офисини ёпишни талаб қилди.

АҚШнинг Беларусдаги махсус вакили Жули Фишернинг баёнотида айтилишича, 20 октябрь куни Беларусь ҳукумати Қўшма Штатларни ушбу қарор ҳақида хабардор қилган.

Шунингдек, Беларусь ҳукумати элчихонани 20 нафардан ортиқ беларуслик ходимларни ишдан бўшатишга мажбур қилмоқда, деб маълум қилди АҚШ вакили.

Баёнотда айтилишича, ушбу чоралар Америка томонини беларусь халқига фойда келтирган ҳамда икки мамлакат фуқаролари ўртасидаги алоқаларни ривожлантиришга хизмат қилган ахборот бериш ва ҳамкорлик бўйича ишлардан воз кечишга мажбур қила олмайди.

Ўтган йил августда Беларусда бўлиб ўтган президент сайловидан сўнг АҚШ республикага нисбатан санкцияларни кенгайтирганди. Минск бу қарорни нодўстона деб атади ва Жули Фишернинг АҚШнинг Минскдаги элчиси бўлишига розилик бермади. Мамлакат ҳукумати талаби билан Америка элчихонаси дипломатик миссия штатини қисқартирди.