Хитой АҚШга Пекин Олимпиадасини бойкот қилгани учун жавоб қайтариш билан таҳдид қилди

АҚШ Пекиндаги қишки Олимпиада ўйинларини дипломатик бойкот қилгани учун жавоб беради, деди Хитой ташқи ишлар вазирлиги вакили Чжао Лицзян.

“АҚШ нотўғри йўл тутгани учун бадал тўлайди”, – дея унинг сўзларидан иқтибос келтиради Channel NewsAsia.

Лицзяннинг сўзларига кўра, Пекин АҚШнинг бу ҳаракатига нисбатан қарши чоралар кўради. Аммо у қандай чоралар кўрилишини айтмади ва воқеалар ривожини кузатишга чақирди.

“АҚШ спортни сиёсийлаштиришни ва қишки Олимпиада ўтказилишини издан чиқаришни бас қилиши керак, акс ҳолда бу икки томонлама ва бошқа қатор соҳалардаги ҳамкорликка зарар етказиши мумкин”, – дея қўшимча қилди у.

Душанба куни Оқ уй матбуот котиби Жен Псаки АҚШ 2022 йилда Пекинда ўтадиган қишки Олимпия ўйинларига дипломатик бойкот эълон қилганини маълум қилди. Унинг таъкидлашича, ушбу қарор АҚШ дипломатик ва расмий шахслари Олимпиадага бормасликларини англатади, бироқ спортчилар мусобақаларда иштирок эта олиши мумкин.   

Аввалроқ АҚШ президенти Жо Байден Пекин Олимпиадаси бойкот қилиниши мумкинлигини айтганди. Байденнинг таъкидлашича, бу қарор Хитой томондан нафақат Синцзянда, балки Тибет ва Ҳонгконгдаги инсон ҳуқуқлари бузилишлари билан боғланган. Вашингтоннинг ушбу ташаббусини Австралия қўллаб-қувватлаган.

Пекин Олимпиадаси 2022 йил 4-20 февраль кунлари бўлиб ўтади.