Термиздаги кўп қаватли уйда жойлашган хонадонда ёнғин содир бўлди

Термиз шаҳридаги кўп қаватли уйда жойлашган хонадонда ёнғин содир бўлган. Сурхондарё вилояти Фавқулодда вазиятлар бошқармаси ахборот хизматининг хабар беришича, ёнғинда 5 киши қутқарилган.

Маълум қилинишича, 2021 йил 13 декабр куни соат 14:40да Термиз шаҳар ФВБга “Боғишамол” МФЙ Алишер Навоий кўчасида жойлашган кўп қаватли уйдаги хонадонлардан бирида ёнғин содир бўлаётгани тўғрисида хабар келиб тушган.

Ёнғин-қутқарув экипажлари воқеа жойига соат 14:45да етиб борган. Ёнғин 14:47да қуршаб олинган ва соат 14:55да ўчирилган. Қутқарувчиларнинг саъй-ҳаракатлари натижасида уйнинг 30 метр квадрат майдони ёниб кетишдан сақлаб қолинган.

Шунингдек, ёнғиндан 5 киши қутқариб қолинган, шундан 2 нафари вояга етмаган болалар бўлган.

Ёнғин оқибатида яшаш уйининг 22 метр квадрат майдондаги шифт қисми ва уй жиҳозлари ёнғиндан зарарланган.

Қайд этилишича, ёнғинда ҳеч ким жабрланмаган ва ҳалок бўлмаган. Ҳозирда ёнғин сабаби ва келтирилган зарар миқдори аниқланмоқда.