Самарқандда хотини билан жанжаллашиб 1 ёшга тўлмаган ўғлини ўлдирган шахсга ҳукм ўқилди

Самарқанд шаҳрида хотини билан жанжаллашиб қолгач, жаҳл устида 1 ёшга тўлмаган ўғлини ўлдирган эркакка ҳукм ўқилди. Бу ҳақда “Ёшлар” телеканалининг информацион дастурида хабар берилди.

Маълум қилинишича, Самарқанд шаҳри Гўрўғли кўчасида яшовчи оилада эр-хотин ўртасида жанжал келиб чиққан. Аёл эрининг айтганини қилмагани учун эркак қасд олиш мақсадида унинг қўлидаги 1 ёшга тўлмаган болани олиб 2-3 марта боши билан ерга урган. Оқибатда бола воқеа жойида ҳалок бўлган. Унинг жони узилганини кўрган эркак воқеа жойидан қочиб кетган.

Жиноят ишлари бўйича Самарқанд шаҳар судида ўтказилган суд мажлисида эркак ўз айбига иқрор бўлмаган. Унинг онаси ҳам эркакнинг айбсизлигини айтган. Аммо гувоҳлар ва жабрланувчининг кўрсатмалари бир хил чиққан ва эркакнинг жинояти тасдиқланган. Шунингдек, дастлабки тергов ҳаракатларида эркак болани қандай ўлдирганини сўзлаб берган.

Суд эркакни Жиноят кодексининг 97-моддаси (қасддан одам ўлдириш) 2-қисмининг «в» ва «ж» бандлари билан айбдор деб топган. Унга 18 йил озодликдан маҳрум қилиш жазоси тайинланган.