Коронавирус ҳужуми. «Реал» мағлубият билан бошлади, таркибнинг ярмисиз қолган «Барса»да ғалаба

Мадрид таътилдан чиқа олмаяпти

Хетафе – Реал 1:0 (1:0, 0:0)
Гол: 1:0 – 9 Унал.
Хетафе – Сория, Суарес, Кабако (Ньом, 83), Митрович, Куэнка, Оливера, Максимович, Арамбарри, Аленья (Флорентину, 74), Сандро Рамирес (Мата, 64), Унал (Янкто, 83).
Реал Мадрид – Куртуа, Васкес (Петер, 85), Милитао, Алаба, Менди (Марсело, 46), Модрич, Каземиро, Кроос (Иско, 85), Родриго (Мариано Диас, 67), Бензема, Асенсио (Азар, 46).
Огоҳлантиришлар: Родриго (21), Суарес (56), Арамбарри (82), Каземиро (87), Оливера (90).

АПЛда бирор жамоада коронавирус авж олиши ўйинлар қолдирилиши учун етарли бўлса, ла лигада қоидалар бошқача: биринчи ва иккинчи жамоадан жами 13 нафар соғ футболчи топилса, ўйнаш керак бўлади. Касалланишнинг биринчи тўлқинини бошдан кечирган «Реал»да Винисиус Жуниор, Камавинга, Вальверде, Куртуа ва Лука Йович ҳам тестга мусбат натижа топширди. Карло Анчелотти футболчилардан норозилигини яширмади ва санитар протоколни ҳурмат қилиш ва ўйнашда давом этиш кераклигини айтди.

Эҳтимол, ҳозиргидан қийинроқ вазият бўлганида италиялик мутахассиснинг реакцияси бошқачароқ бўларди, аммо чемпионат пешқадами коронавирус ҳужумидан бошқаларга қараганда осонроқ чиқмоқда - Куртуа тезда тузалди ва якшанба кунги ўйинга тайёр бўлди, аммо лигада жон сақлаш учун курашаётган «Хетафе» мадридликлар ҳимоясидаги қўпол хатодан фойдаланди. 9-дақиқада Эдер Милитаодан тўпни олиб қўйган Энес Юнал Куртуани алдаб ўтиб, ҳисобни очди.

Бу тасодифдек кўринганди. «Реал» ташаббусни қўлга олиб, вазиятлар яратди, Модричнинг зарбаси дарвоза тўсинига тегди, жавоб голи урилиши вақт масаласидек эди. Аммо Анчелотти ўйиндан норози эди ва танаффусда чап қанотни янгилаб, Марсело — Азар жуфтлигини туширди. Фақат бу ўйинни янада ёмонлаштирди. Мадридликлар иккинчи бўлимни жуда бўш ўтказишди ва Сория дарвозасига айтарли хавф сола олишмади.

Йил мағлубият билан бошланди, бу мадридликлар учун чемпионатда мавсумдаги иккинчиси - биринчиси октябрь ойида «Эспаньол»дан қабул қилинган, шундан кейин 11 ўйиндан иборат мағлубиятсиз серия қайд этилганди.

«Футболчилар асабийлашишди. Биз тўпни кўп йўқотдик ва уларнинг голидан кейин дуэлларни ютқаздик. Жамоа бугун таътилда эди. Ҳеч қандай концентрация, умуман ҳеч нарса кўрсата олмадик. Биз шунчаки уларга очко бердик ва буни қабул қилиб бўлмайди», — дея тан олди ўйиндан кейин Анчелотти.

Лекин ваҳимага ҳожат йўқ, бугун «Севилья» ўз ўйинида ғалаба қозонган тақдирда ҳам, орадаги фарқ 5 очкони ташкил этади.

«Хетафе» эса тўққиз йил ичида илк бор «Қироллик клуби»ни мағлуб этди. Бунда Кике Санчес Флореснинг меҳнатини эътироф этиш керак. У жамоага келишидан олдин жамоа саккиз турда атиги бир очко олганди, мураббий алмашгач — 11 ўйинда 17 очко тўпланди ва жамоа хавфли зонани тарк этди.

Кутилмаган қаҳрамон

Мальорка – Барселона 0:1 (0:1, 0:0)
Гол: 0:1 – 44 де Йонг.
Мальорка – Рейна, Маффео, Руссо, Вальент, Коста, Ли Кан Ин (Льябрес, 71), Дани Родригес, Санчес (Жорди Мбоула, 70), Баба (Руис де Галаррета, 61), Батталья (Пратс, 84), Анхель Родригес (Фер Ниньо, 61).
Барселона – тер Стеген, Мингеса (Лангле, 76), Пике, Эрик Гарсия, Араухо, Нико Гонсалес (Альваро Санс, 71), де Йонг, Пуч, Ахомаш (Педрола, 80), де Йонг, Жужла.
Огоҳлантиришлар: Жужла (79), Коста (83), Пратс (89), Дани Родригес (90), Лангле (90), Вальент (90), Маффео (90).

Каталонияликлар молиявий муаммоларга қарамай, эҳтимолий трансферлар билан ахборий кенгликни портлатишмоқда, клуб дастлабки трансферни амалга ошириб бўлди - «Манчестер Сити»дан 55 миллион евро эвазига Ферран Торрес олиб келинди. Аммо янги футболчисини ўйнатиш учун «Барселона» тўловлар ведомостини енгиллаштириши керак. Клуб Филиппе Коутиньо ва Умтитини сотиши деярли аниқ, бундан ташқари январда Каталония пойтахтини Дембеле ҳам тарк этиши мумкин, раҳбарият ва футболчи ўртасида шартномани янгилаш бўйича музокаралар самарасиз якунланди. Бу футболчилар сотуви ҳақидаги хабарлар фонида «Камп Ноу»га Мората келиши кутилаётгани ҳақида хабар пайдо бўлди.

Аммо «Барса»нинг юқоридаги муаммолари ҳал қилиниши учун бутун январь турган бўлса, навбатдаги тур доирасида «Мальорка»га қарши ўйин учун таркиб йиғиш қийин вазифага айланди. Кўк-анорранглилар таркибида коронавирус авж олган, касалланганлар сони геометрик прогрессия бўйича кўпайди, ўйин арафасида Хави 17-18 футболчи сафдан чиққанини айтиб, лиганинг ўйинни қолдирмаслик қарорини ақлсизлик деб атади.

Бошқа томондан, бу футболчилардан етти нафари ковид туфайли эмас, жароҳатланиб олдинроқ сафдан чиққанди.

• Жароҳат: Мартин Брэйтуэйт, Сержи Роберто, Мемфис Депай, Ансу Фати ва Педри. Сўнгги уч футболчи машғулотларга қайтган. Ферран Торресда ҳам кичик жароҳат бор, аммо у барибир ўйнай олмасди, 3 январь ҳолатига кўра ла лига қайдномасидан ўтказилмаган;
• Дисквалификация: Сержи Бускетс ва Гави «Мальорка»га қарши ўйинни сариқ карточкалар сони кўпайиб кетгани учун ўтказиб юборишарди;
• Коронавирус: Гави вирус ҳам юқтириб олган ва Усмон Дембеле, Сержиньо Дест, Филиппе Коутиньо, Абде Эззалзули, Дани Алвес, Жорди Альба ва Алекс Бальде каби футболчилардан иборат кампанияга қўшилган.

Каталонлар заявканинг ярмини «Барселона-Б» ва U-19 жамоаси футболчилари билан тўлдиришига тўғри келди. Жамоа билан «Мальорка»га мухлисларга таниш бўлиб қолган Жужла, Ахомаш ва Нико Гонсалесдан ташқари Альваро Санц, Арнау Комас, Гильем Жаиме, Эстанис Педрола, Лукас Де Вега ва Мика Мармоль каби янги номлар ҳам йўл олди. Бу фонда Рональд Араухо – фахрий футболчи бўлиб кўринади.

Ўйин қолдирилиши мумкинлиги ҳақидаги баёнот эса «Мальорка»дагиларнинг норозилигини уйғотди. Оролликлар жамоаси бош мураббийи Луис Гарсия унинг жамоаси лигада коронавирусдан энг кўп жабр чеккан жамоа эканини эслатиб, кўк-анорранглиларнинг захирасидагилар ла лиганинг исталган жамоаси бошланғич таркиби билан тенг даражада эканини таъкидлади.

Умуман олганда, ҳаёт давом этади, «Мальорка» стадионида эса Самюэл Это'Онинг кўриниши акс этган фреска очилиши маросими ўтказилди. Камерунлик футболчи собиқ жамоаси ўйинига ташриф буюрди ва совғалар қабул қилиб олди, ўйин бошланиши арафасида эски дўсти Хави билан қуюқ сўрашди.

Ўйин меҳмонлар сценарийси бўйича кечди ва майдондаги энг ёрқин фигура Люк де Йонг бўлди. Ёзда Куман иложсизликдан таркибга олган ва айни вақтда ўзига янги клуб ахтараётган («Кадис» ва Туркиядан вариантлар бор) кутилмаган қаҳрамонга айланди.

Ушбу нидерландиялик Хави келганидан кейин фақат икки ўйинда бошланғич таркибда тушди, у ҳозирги мураббийлар штабига тўғри келмаслигини айтишмоқда. У эса бу ўйиндаги асосий ҳайлайтлар иштирокчисига айланди - биринчи бўлимда дарвоза устунини пойлади, кейин қайчи услубидаги зарбаси билан дарвоза тўсинни титратди, ниҳоят танаффус арафасида олдинга чиқишда хатога йўл қўйган дарвозабонни жазолаб, ҳисобни очди. 

Иккинчи бўлимда Санс ва Педрола дебют қилди, «Барселона» эса ҳисобни ушлашга ўйнади. Ғалабани сақлаб қолишда Марк-Андре тер Стеген ҳам ёрдам берди - қўшимча дақиқаларда унинг фантастик сэйви жамоани очко йўқотишдан қутқарди.

Мағлубиятсиз серияни тўрт ўйинга етказган каталонияликлар «Реал Сосьедад» ва «Райо Вальекано»ни ортда қолдириб, бешинчи ўринга кўтарилди. Хави даврида «Барса» сафар ўйинларида мағлуб бўлиш анъанасига барҳам берди (икки ғалаба ва икки дуранг) ва энди жамоани Чемпионлар лигаси квартетидан биргина очко ажратиб турибди, лекин «Реал»гача 15 очко бор.

«Атлетико» тўртликка қайтди

Атлетико – Райо Вальекано 2:0 (1:0, 1:0)
Голлар: 1:0 – 28 Корреа, 2:0 – 53 Корреа.
Атлетико – Облак, Триппьер, Хименес, Эрмосо, Лоди, Карраско (Фелипе, 90), де Пауль, Кондогбиа, Лемар, Корреа, Суарес (Матеус Кунья, 72).
Райо Вальекано – Зидан, Балиу, Савельич, Мараш, Фран Гарсия, Паласон (Мартин, 46), Унаи Лопес (Трехо, 59), Родригес (Бебе, 59), Комесанья (Фалькао, 76), Оскар Валентин, Гвардиола (Агирре, 82).
Огоҳлантиришлар: Суарес (26), Хименес (63), де Пауль (73).

Диего Симеоне жамоасида инқироздан чиқиш учун яхши имконият юзага келди — қаторасига тўрт мағлубиятдан кейин квартет учун рақиблар билан ўзаро ўйинда ғалаба қозониш орқали квартетга қайтиш. Декабрь ойи охирида «матрасчилар» етакчилари Коке, Гризманн, Эррера ва Жоау Фелишда коронавирус аниқланганди, аммо «Атлетико» захираси «Райо»никидан анча кучлироқ эди.

«Асаларилар» эса 17 футболчиси касалланганини эълон қилиб, чемпионатнинг қайғули рекордини ўрнатишганди. Дастлабки ҳолатлар Рождестводан олдин аниқланганди, шу туфайли жамоа бош мураббийи Андони Ираола таътилни бир кунга узайтирди. Аммо биринчи иш куни — навбатдаги тест натижаларидан кейин — машғулотларда фақат 8 футболчи қатнашиши мумкинлиги маълум бўлди.

Натижада меҳмонлар дарвозасини биринчи турдан бери майдонга тушмаган Люк Зидан эгаллади, ўшанда Зинедин Зиданнинг ўғли 16-дақиқадаёқ четлатилганди. Ўйин бошида ҳимоячиларни алдаб ўтган Суарес французни хафа қила олмади, аммо кўп ўтмай Корреанинг зарбаси аниқ чиқди. Аргентиналик футболчи уникал натижа қайд этмоқда - у сўнгги беш йилда уч марта «Атлетико»нинг янги йилдаги илк голи муаллифи бўлган.

Корреанинг иккинчи голи «Райо» учун ҳукм бўлди ва ўйин фақат бир томонлама кўриниш олди. Мезбон мухлислар томонидан олқишлар билан қарши олинган Фалькао ҳам ёрдам бера олмади. Ўйин қаҳрамони Корреа нафақат ўз жамоасини Чемпионлар лигаси ҳудудига қайтарди, балки голлари сонини 52тага етказиб, Пауло Футре билан тенглашди ва клуб тарихидаги энг яхши тўпурарлар ўттизлигига кирди.

Аспас «Бетис»ни нокаут қилди

Андалусияликлар бу ўйин натижасидан қатъи назар учинчи ўринни сақлаб қолиши аниқ эди. «Бетис»да ҳам коронавирус авж олган, клуб тести мусбат натижа берган футболчилари номини очиқламади, аммо бошланғич таркиблар протоколи пайдо бўлишидан аввалроқ журналистлар касалланганлардан бирининг кимлигини аниқлашди. Гап шундаки, «Бетис» билан яқинда шартнома имзолаган Борха Иглесиас машҳур теледастур жонли эфирида чиқишдан бош тортишга мажбур бўлганди.

Аммо форвард ўйингача заявкага қайтди ва Мануэл Пеллегринининг хавотирларига терс ўлароқ андалусияликлар захираси Фекир ва Тельо ҳам борлигини ҳисобга олган ҳолда у қадар кучсиз кўринмасди. Бу муҳим эди, чунки «Сельта» «Бенито Вильямарин»да ўйинни жуда кучли бошлади. Майдон эгалари дарвозабони Руй Силва тўпни ташлаб беришда хатога йўл қўйиши Гаурдадо жарима майдони ичида Сервини йиқитишига олиб келди ва Аспас нуқтадан адашмади - у қаторасига еттинчи мавсум камида 10тадан гол урмоқда. Галисияликлар етакчиси  Виктор Руиснинг эътиборсизлигидан фойдаланиб иккинчи голни урди ва ғалабани мустаҳкамлади.

«Бетис»га танаффус ҳам, ўйинчи алмаштиришлар ҳам ёрдам бермади. Мезбонлар майдоннинг иккинчи қисмида ҳам тўпга эгалик қилишди, аммо яққол голли вазиятлар юзага келмади. Агар Санти Минанинг зарбаси устунга тегмаганида ҳисоб янада йирик кўриниш олиши мумкин эди. Яшил-оқлар учун бу қаторасига тўрт ғалабадан кейин кетма-кет иккинчи мағлубият бўлди.

UPD: 3 январь кунги ўйинда «Севилья» «Кадис»ни кичик ҳисобда енгди (1:0) ва иккинчи ўринни мустаҳкамлади.