2022 йилда 21 минг фуқарога «ишчи виза» билан боғлиқ харажатлари учун компенсация тўланади

Хорижий давлатларда ишлаш истагида бўлган фуқарони касб-ҳунар ва хорижий тилларга ўқитишни амалга ошириш режалаштирилмоқда. Бу 2022–2026 йилларга мўлжалланган тараққиёт стратегиясини 2022 йилда амалга ошириш бўйича “Йўл харитаси” лойиҳасида белгиланган.

Фото: Kun.uz

Хусусан, хорижий давлатларнинг меҳнат бозори эҳтиёжларини ўрганиш, энг кўп талаб этиладиган касбий мутахассисликларни аниқлаш ва фуқароларни ушбу мутахассисликларга йўналтириш бўйича чора-тадбирлар ишлаб чиқиш кўзда тутилмоқда.

Республика даражаси ва ҳудудлар кесимидаги касб-ҳунарга ва хорижий тилларга ўқитиш чора-тадбирлар режасини ташқи меҳнат миграциясига юбориш дастури доирасида тасдиқлаш ҳам мўлжалланган.

Бунда, “Ишга марҳамат” мономарказлари, касб-ҳунарга ўқитиш марказлари, қурилиш соҳаси малакали мутахассисларини тайёрлаш марказлари, қисқа муддатли касб-ҳунарга ўқитиш курслари, касб-ҳунарга ўқитиш масканлари, турли вазирлик ва идоралар ҳамда нодавлат таълим муассасалари қувватлари ва имкониятларидан самарали фойдаланиш чораларини кўриш режалаштирилган.

Хорижда ишлаш истагида бўлган фуқароларни касб-ҳунарга ва хорижий тилларга ўқитиш ташкил этилади. Бунда, 50 минг нафар фуқаро ўқитилади.

2022 йилда 21 минг касбга ўқиган фуқароларга хорижий тиллар ёки касб бўйича малака имтиҳонларини топшириш, йўл чиптасини харид қилиш, ривожланган давлатларда меҳнат фаолиятини амалга ошириш учун “ишчи виза”ни расмийлаштириш билан боғлиқ харажатлари учун компенсация тўланади.