Қозоғистонда коммунал хизматлар учун тарифлар 1 июлгача оширилмайдиган бўлди

Қозоғистонда коммунал хизматлар учун тарифлар 1 июлгача оширилмайди. Бу ҳақда мамлакат иқтисодиёт вазирлигига таяниб РИА Новости хабар бермоқда.

«Коммунал хизматлар учун тарифлар 2022 йил 1 июлга қадар оширилмайди. Коммунал хизматлар, яъни сув, иссиқлик, газ ва электр таъминоти тарифлари оширилишига нисбатан мораторий жорий этилади», — дейилади хабарда.

1 январь кунидан ҳукумат суюлтирилган газ нархини икки бараварга — 60 тенгедан 120 тенгега (тахминан 1500 сўмдан 3000 сўмга) кўтарганди.

2 январь куни Қозоғистоннинг Манғистау области Жанаўзен шаҳрида автомобиль эгалари бундан норози бўлиб, оммавий митингга чиқишди.

3 январь куни ҳукумат намойишчилар талабларини бажара олмаслигини билдирди — нархларни аввалги ҳолатга қайтариш мумкин эмаслиги, чунки бу «бозор қонунлари»га тўғри келмаслигини айтишди.

Кўп ўтмай Ақтау области марказида намойишлар бошланди, кейинги кунларда намойишлар тўлқини Қозоғистоннинг бошқа барча йирик шаҳарларига ёйилди. 

4 январь куни ҳукумат комиссияси газ нархини 50 тенгега туширишни ваъда қилди. Аммо намойишлар тўхтамади. Оммавий намойишлар фонида ҳукумат истеъфога чиқди.

Намойишлар сабаб ўнлаб инсонлар ҳалок бўлди. Тартибсизликлар оқибатида етказилган зарар 200 миллион доллар деб баҳоланмоқда.