Australian Open'да финалчилар аниқланди. Медведев энди Надалнинг «байрамини бузиш»га уринади

Эркаклар ўртасидаги яккалик баҳсларида финалчилар маълум бўлди. Испаниялик Рафаэль Надал италиялик Маттео Берреттини билан баҳсни тўрт сетда ўз фойдасига ҳал қилди: 6-3, 6-2, 3-6, 6-3.

Айни дамда дунёнинг бешинчи ракеткаси ҳисобланган Надал фаолияти давомида 29-марта «катта дубулға» турнирлари финалига чиқди. У финалларнинг 20 тасида зафар қучган. Australian Open'да Надал олтинчи марта финалда ўйнайди. Испаниялик теннисчи уларнинг биттасида ғалаба қозонган, тўрт марта енгилган.

Иккинчи финалчи россиялик дунёнинг иккинчи ракеткаси Даниил Медведев бўлди. У яримфиналда грециялик Стефанос Циципасни тўрт сетда мағлуб этди: 7-6, 4-6, 6-4, 6-1.

Медведев фаолияти давомида тўртинчи марта «катта дубулға» таснифидаги мусобақа финалига чиқди. Бунгача россиялик теннисчи икки марта US Open, бир марта Australian Open финалида ўйнаган. Ўтган йил Австралиядаги финалда Новак Жоковичга енгилган, АҚШ очиқ чемпионатида эса айнан Жокович устидан ғалаба қозонган.

Даниил Медведев ўтган йил US Open финалида Новак Жоковичга 21-марта «катта дубулға» совринини қўлга киритишга йўл қўймаганди. Энди россиялик теннисчи яна бир афсонавий теннисчи Надалга 21-совринни ютишга халақит беришга уриниб кўради. Ҳозирча Медведев ва Надал ўртасидаги ўзаро ўйинларда устунлик испаниялик спортчи томонида: 3-1.

Йилнинг илк йирик мусобақаси Australian Open'нинг бу йилги соврин жамғармаси 54 миллион долларни ташкил этади. Ғолиб 3,1 миллион доллар, финалчи 1,5 миллион доллар мукофотни қўлга киритади. Австралия очиқ чемпионатида ғалаба қозониш бўйича рекордчи дунёнинг биринчи ракеткаси Новак Жокович ҳисобланади. Тўққизта финалда иштирок этган серб уларнинг барчасида ғалаба қозонган.

Бу галги баҳсларда Жокович коронавирусга қарши эмланмагани ортидан келиб чиққан можаро сабаб иштирок эта олмаяпти.